პრემიერ-მინისტრის, ვანო მერაბიშვილის განცხადებით, ქვეყანაში ბევრი რამ გაკეთდა, მაგრამ უამრავი ოჯახი რჩება ვისთვისაც ცხოვრება ძალიან რთულია. 

ამის შესახებ განცხადება, მერაბიშვილმა დღეს, სპორტის სასახლეში გამართულ წინასაარჩევნო ყრილობაზე, სიტყვით გამოსვლისას გააკეთა.

მერაბიშვილის თქმით, ამ დროისათვის ყველაზე დიდი პრობლემა უმუშევრობაა და სწორედ ამ პრობლემას უნდა შეებრძოლონ. 

“ბევრმა ოჯახმა ვერ იგრძნო ის სიკეთე, რაც საქართველოს აქვს. სწორედ ამიტომ შევიმუშავეთ ახალი პროგრამა “მეტი სარგებელი ხალხს”, რომელიც პრობლემების გადაჭრაში დაგვეხმარება. აუცილებელია, რომ თითოეულმა მოქალაქემ მეტი სარგებელი იგრძნოს ხელისუფლებისაგან”,- განაცხადა მერაბიშვილმა 

პრემიერის თქმით, “ნაციოანლური მოძრაობის” მთავრი ამოცანაა განვითარებული მომავლისკენ სვლა.  

“პოლიტიკური რუკიდან 90-იანი წლების დინოზავრები უნდა წავშალოთ, რომელთა აჩრდილებიც დღეს საქართველოსა და თბილისის ქუჩებში კიდევ დადიან. ასევე მინდა მივესალმო აფხაზებს და ოსებს და ვუთხრა მათ, რომ მათი მომავლის გზა ერთიან საქართველოში გადის. მზად ვართ ხელი გავუწოდოთ და დავეხმაროთ გამოვიდნენ იმ სიბნელიდან სადაც არიან”,- განაცხადა მერაბიშვილმა. 

internet.ge