პარლამენტის თავმჯდომარის, დავით ბაქრაძის შეფასებით, ევროსაბჭოს  წინასაარჩევნო სადამკვირვებლო დელეგაცია ერთ–ერთი იქნება იმ სადამკვირვებლო მისიიდან, რომელიც არჩევნების ობიექტურ და ყოვლისმომცველი შეფასების გაკეთებას შეძლებს.    

როგორც ჟურნალისტებს დელეგაციის წევრებთან გამართული შეხვედრის შემდეგ, ბაქრაძემ განუცხადა, დამკვირვებლებს ყველაფერი აინტერესებთ, რაც მიმდინარე საარჩევნო გარემოსა და საპარლამენტო არჩევნებისთვის მზადებას ეხება.

მისი თქმით, მთლიანობაში დელეგაციის წევრების განწყობა პოზიტიური და კარგია.

„ისინი ხედავენ თუ რამდენი რამ გაკეთდა საქართველოში და რა კეთდება, რომ არჩევნები იყოს დემოკრატიული და თავისუფალი. მეორეს მხრივ, მათ ის პრობლემები აწუხებთ, რაც დღევანდელ საარჩევნო გარემოშია. ძირითადად ეს პოლარიზაციაა, რომელიც ძალიან ბევრი პრობლემის საფუძველი და სადავეა. ჩვენ ყველას კარგად მოგვეხსენება საარჩევნო პროცესის  პოლარიზაცია თუ საიდან მოდის. წინა წლებში, „ნაციონალურმა მოძრაობამ“ ამ პოლარიზაციის შესამცირებლად ძალიან ბევრი რამ გააკეთა, მაგრამ სამწუხაროდ, ბოლო რვა თვეში არა ჩვენი მიზეზით, ქართული პოლიტიკური სპექტრი ისევ ღრმად პოლარიზებულია. ამიტომ, პოლარიზაცია იყო ძირითადი პრობლემა და რისკი, რომელიც მათი შეფასებით პრობლემებს ქმნის. ევროსაბჭოს დელეგაცია ერთ–ერთი იქნება იმ სადამკვირვებლო მისიიდან, რომელიც შეძლებს, რომ ნამდვილად ობიექტური და ყოვლისმომცველი შეფასება გააკეთოს.“, – დასძინა მან.

 internet.ge