ბიძინა ივანიშვილის განცხადებით, თუ საპარლამენტო არჩევნების შედეგებს ავტორიტეტული სადამკვირვებლო მისიის წარმომადგენლები აღიარებენ, კოალიცია პირველ ოქტომბერს მიღებულ შედეგებს არ გააპროტესტებს. როგორც ივანიშვილმა გადაცემა „აქცენტებში“ სტუმრობისას განაცხადა, სადამკვირვებლო მისიები არჩევნების გაყალბებას არ დაუშვებენ.

გარადა ამისა, ივანიშვილი ირწმუნება, რომ გაყალბებას არც კოალიცია „ქართული ოცნება“ დაუშვებს.

„თუ ხელისუფლება მოახერხებს უწყისების გადაწერას, ამ შედეგებს არავინ აღიარებს. გპირდებით, რომ ყველა ხმას დავიცავთ, თითოეული ამომრჩევლის ხმას ჩვენთვის დიდი ფასი აქვს“,– განაცხადა ივანიშვილმა.

კითხვაზე, რა სახის დანადგარით აპირებს კოალიციის ლიდერი არჩევნების გაყალბებისგან დაცვას, ივანიშვილი აცხადებს, რომ დანადგარს რამდენიმე დღეში გახდის საჯაროს.

„ეს დანადგარი სასწაულმოქმედი არ გახლავთ, უბრალოდ ჩვენ კარგი მექანიზმი შევიმუშავეთ არჩევნების გაყალბების აღსაკვეთად,“– განაცხადა ივანიშვილმა.

კოალიციის ლიდერმა პედაგოგებს კვლავ მიმართა და მათ „ღირსების დაბრუნებას“ დაჰპირდა.

„მასწავლებლების წინაშე ქედს ვიხრი, მაგრამ იმ პირებს, რომლებიც არჩევნების გაყალბებაში არიან ჩართულნი, მათ შორის მასწავლებლებსაც შევახსენებ, რომ მათ კანონი აგებინებს პასუხს და არა ჩვენ“,– განაცხადა კოალიციის ლიდერმა.

internet.ge