“ქართული ოცნების” საარჩევნო სიის პირველი ნომრის კახი კალაძის განცხადებით, ქვეყანას დასაბრუნებელი აქვს, არა მხოლოდ ტერიტორიები, არამედ ის ადამიანები, ვინც ამ ტერიტორიებზე ცხოვრობენ.

ამის შესახებ განცხადება, კალაძემ დღეს, საზოგადოებრივი მაუწყებლის ეთერში გამართული დებატების დროს გააკეთა.

მისი თქმით, ქვეყანამ უნდა დაამყაროს პირდაპირ კონტაქტი აფხაზებსა და ოსებთან.

“ჩვენი მთავარი იარაღი ტერიტორიული მთლიანობის აღდგენაში არის ეკონომიკა და დემოკრატია, ჭეშმარიტი დემოკრატია მოხსნის შიშის ფაქტორს, ხოლო ეკონომიკური აღმავლობა გააჩენს ინტეგრაციის სურვილს. დღეს, როცა ოსი და აფხაზი ხედავს რა პირობებში აცხოვრებს სააკაშვილი ქართველ ერს, ამგვარ სახელწიფოში დაბრუნების სურვილი მათ არ ექნებათ. ჩვენი ქვეყანა უნდა გახდეს მიმზიდველი ყველასთვის. დასაბრუნებელი გვაქვს არა მხოლოდ ტერიტორიები, არამედ ის ადამიანები, ვინც ამ ტერიტორიებზე ცხოვრობენ. ჩვენ უნდა დავამყაროთ პირდაპირი კონტაქტი აფხაზებთან და ოსებთან. ასევე, მაქსიმალურად უნდა გამოვიყენოთ საერთაშორისო ბერკეტები და მოკავშირეების აშშ-სა და ევროკავშირის ქვეყნების მხარდაჭერა”,- განაცხადა კალაძემ.

Internet.ge