საპარლამენტო არჩევნებამდე ერთი დღით ადრე, საქართველოს პრეზიდენტმა საზოგადოებას მცხეთიდან მიმართა. მიხეილ სააკაშვილმა ხვალინდელი დღის მნიშვნელობაზე გაამახვილა ყურადღება.

ქვეყნის პირველი პირის თქმით, ხვალ სიმართლის დრო დგება, როცა ქართველი ერი გადაწყვეტს საქართველოს ბედს.

“ხვალ გადაწყდება ჩევნ ვინარჩუნებთ თუ არა იმ თავისუფლებას, რომლისთვისაც ჩვენი წინაპრები იბრძოდნენ და წირავდნენ თავს. დარწმუნებული ვარ, რომ საზღვრებთან და საზღვრებს შიგნით, ძალის უპრეცენდენტო მობილიზება ხდება, არჩევნების ჩაშლის მავანთა გეგმები ვერ შეუშლის ხელს დემოკრატიის დიდ გამარჯვებას. ჩვენი ქვეყნის ბედი ხვალ წყდება. ხვალ ეპოქალური საკითხი წყდება: როგორი ქვეყანა გვინდა გვქონდეს. ხვალ ჩევნს მტერს აქვს ბოლო შანსი მოგვაბრუნის დამოუკიდებლობის გზიდან, მაგრამ დარწმუნებული ვარ, ჩვენი თავისუფლების მოყვარული ერი გადადგამს საბოლოო და გადამწყვეტ ნაბიჯს, დამპყრობლის მარწუხებისგან გათავისუფლებისკენ”,- განაცხადა პრეზიდენტმა.

სააკაშვილის თქმით, ქვეყანა აღარასდროს უნდა დაბრუნდეს უკან, ხვალინდელი არჩევანი კი, არის გადაწყვეტილება ქვეყნის თავისუფლებასა და უუფლებობას შორის.

“განვლილმა საარჩევნო კამპანიამ ძალიან დაძაბა საზოგადოება, ამიტომ გთხოვთ არჩევანი გააკეთოთ არა ემოციით, არამედ გონებით. გადაწყვეტილების მიღებისას იფიქრეთ იმაზე, თუ სად იყო ჩვენი ქვეყანა 9 წლის წინ და სად ვართ დღეს. ხვალინდელი დღე ძალიან მნიშვნელოვანია ჩვენი ქვეყნისთვის, ამიტომ ნუ დარჩებით სახლში. პირველი ოქტომბერი ვაქციოთ თარიღად, როდესაც ქართველმა ხალხმა დაამტკიცა თავისი სიბრძნე და სამშობლოს უპირობი ერთგულება. დარწმუნებული ვარ, ხვალ საღამოს ყველანი ამაყები ვიქნებით”,- განაცხადა ქვეყნის პირველმა პირმა.

internet.ge