1-ელი ოქტომბრის არჩევნების შესაძლო გაყალბებასთან დაკავშირებით, ”ქართული ოცნების” წევრის, დავით საგანელიძის განცხადებას ამომრჩეველთა სიების დაზუსტების კომისიის თავმჯდომარე მამუკა კაციტაძე პასუხობს. 

როგორც დღეს გამართულ პრესკონფერენციაზე კაციტაძემ განაცხადა, გუშინ "ქართული ოცნების” წარმომადგენლის მიერ ”პასკვილური” განცხადება გაკეთდა, რომ თითქოს შემდეგი ღონისძიებების გასატარებლად, ცესკო-ს მიმდებარე ტერიტორიაზე სპეცრაზმი და საეჭვო ძალები არიან მობილიზებულები.

”გუშინ ინფორმაცია გავიდა, რომ ცესკოს უკან მობილიზაცია არის სპეცნაზმის და თითქოს იქ  საეჭვო ძალები გროვდებიან. არანაირი ინფორმაცია არ მაქვს არის თუ არა აქ საერთოდ სპეცნაზი. ”ქართული ოცნების” წევრმა თქვა, რომ ამ ოფისის მეშვეობით რაღაც გვირაბებია  და  ეჭვია, რომ თითქოს ჩვენი ოფისი არის გამოყენებული ან იქნება გამოყენებული რაღაც გაყალბებთან დაკავშირებით. ვიტყვი, რომ  არანაირი საერთო ამ მოსაზრებას სიმართლესთან არ აქვს  და არანაირი გვირაბი აქ არ არის”, - განაცხადა კაციტაძემ. 

კომისიის ხელმძღვანელი ”ქართულ ოცნებას” სთავაზობს პირი გამოყოს, რომელიც კომისიის ცენტრალურ ოფისში მიმდინარე პროცესებზე მონიტორინგს განახორციელებს. 

”ამით საბოლოოდ ეჭვებს მოვხსნით”, - დასძინა კაციტაძემ. 

internet.ge