„ნაციონალური მოძრაობის“ პრესსპიკერის, ჩიორა თაქთაქიშვილის ინფორმაციით, „ქართული ოცნების“ წარმომადგენლები საოლქო კომისიის წარმომადგენლებს მუშაობაში ხელს უშლიან და მათზე ზეწოლას ახორციელებენ.  

როგორც დღეს გამართულ პრესკონფერენციაზე, თაქთაქიშვილმა განაცხადა, ზეწოლა იმ საოლქო კომისიებზე ვრცელდება, სადაც „ნაციონალური მოძრაობა“ ლიდერობს.

თაქთაქიშვილის ინფორმაციით, პრობლემებია თეთრიწყაროს საოლქო კომისიაში, სადაც სოზარ სუბარი, კომისიის წევრებს 500 აქტივისტთან ერთად, სხდომის ჩატარების საშუალებას არ აძლევს და მათზე ზეწოლას ახორციელებს.

ასევე პრობლემებია მარტვილში, სადაც კომისიასთან 200 აქტივისტია მობილიზებული, რომლებიც კომისიის წევრებზე ზეწოლას ახორციელებენ.  

თაქთაქიშვილის ინფორმაციით, პრობლემაა ამბროლაურის საოლქო კომისიაშიც, სადაც „ქართული ოცნების“ ამბროლაურის მაჟორიტარი დეპუტატობის კანდიდატის შვილი, კომისიის წევრებს აგრესიულად ექცევა. ასევე პრობლემბია სიღნაღის კომისიაშიც.

„ეს არის უხეში ჩარევა ცესკოს საქმიანობაში, რომელიც კანონით ისჯება. „ქართულ ოცნებას“ მოვუწოდებთ მსგავსი ფაქტები აღკვეთონ“,- განაცხადა თაქთაქიშვილმა.

Internet.ge