„თავისუფალი უნივერსიტეტის“ დამფუძნებელი კახა ბენდუქიძე „ლენტა რუ“-სთან ინტერვიუში აცხადებს, რომ „ტექტონიკური ძვრები“ ქართველი ამომრჩევლის სიმპათიებში წამებასთან დაკავშირებულმა ციხის სკანდალმა განაპირობა. ამასთან, ის დარწმუნებულია, რომ სააკაშვილის მარცხმა პირიქით, მისი ძალის დემონსტრირება მოახდინა.

ბენდუქიძის თქმით, სააკაშვილმა არჩევნებით ყველას აჩვენა, რომ ნამდვილი დემოკრატია.

მისი აზრით, ციხის სკანდალმა გამოიწვია „საათის ისრების დაძვრა“, რეალურად კი მანამდე ოპოზიციას გაცილებით ნაკლები შანსები ჰქონდა.

ბენდუქიძე ამბობს, რომ გადამწყვეტი ახალგაზრდობის რეაქცია იყო, რომელმაც ციხის კადრების დემონსტრირების შემდეგ პროტესტი გამოხატა. ამას კი იმით ხსნის, რომ „ახალგაზრდობა სხვა გარემოში გაიზარდა და მისი წარმოდგენა დღევანდელ საქართველოზე უკეთესიც კია, ვიდრე ეს რეალობაშია. ახალგაზრდობა გამომდინარეობდა იქიდან, რომ მათ არ უნახავთ კორუფცია, უმაღლესებში მხოლოდ საკუთარი ტალანტისა და ცოდნის წყალობით ხვდებოდნენ, ყოველგვარი „ბლატის“ გარეშე“.

ბენდუქიძე ამბობს მას არ მოსწონს არჩევნების შედეგები, მაგრამ ეს რეფორმების შედეგია.
„აღმოცენდა თაობა, რომელსაც აღელვებს ადამიანის უფლებები. ჩემი და თქვენი თაობის ადამიანებს არ აკვირვებთ, რომ ციხეებში შეურაცხყოფენ პატიმრებს. რუსეთში და სხვა მეზობელ ქვეყანაში არავინ გავა ქუჩაში, ისევე როგორც თქვენ არ გახვედით მაგნიტსკის გამო“ - უთხრა ბენდუქიძემ რუს ჟურნალისტს და აღნიშნა, რომ ყველაფერი, რაც მოხდა, ამ ახალგაზრდობის აქტივობის შედეგია.
internet.ge