ცხინვალის ე.წ. პრეზიდენტი, სავარაუდოდ, ვლადიმერ პუტინის კოლეგა, „კაგებეშნიკი“ ლეონიდ თიბილოვი ხდება. ე.წ. საარჩევნო კომისიის წინასწარი მონაცემებით, მან ხმების 41, 94% დააგროვა. მეორე ადგილზეა ადამიანის უფლებების დაცველი, დავით სანაკოევი, ხმების 25,36%-ით, სეპარატისტების ელჩს რუსეთში, დიმიტრი მედოევს მხარი ამომრჩევლის 23,80%-მა დაუჭირა, კომუნისტ სტანისლავ კოჩიევს კი მხოლოდ 5,62%-მა. უფრო ზუსტ მონაცემებს კომისია დღეს გამოაქვეყნებს, თუმცა უკვე საუბრობენ მეორე ტურზე, რომელშიც თიბილოვი და სანაკოევი მიიღებენ მონაწილეობას.
ცხინვალის რეგიონში ჩატარებულ ე.წ. საპრეზიდენტო არჩევნებში მონაწილე რუსი დამკვირვებლები სეპარატისტების ე.წ. საარჩევნო კომისიასთან ერთად ამტკიცებენ, რომ „არჩევნებმა“ დარღვევების გარეშე ჩაიარა. ისინი არ აღიარებენ ზოგიერთი კანდიდატის საარჩევნო შტაბის განცხადებას იმის თაობაზე, რომ ადგილი ჰქონდა ამომრჩევლის მოსყიდვასა და პროვოკაციებს. კერძოდ, ჟურნალისტები იუწყებოდნენ, რომ ზოგიერთი მოქალაქე ფოტოებს უღებდა ბიულეტენებს, რომლებიც კანდიდატ დავით სანაკოევის სასარგებლოდ იყო შევსებული, შემდგომ კი უცნობი პირებისგან ფულს იღებდნენ. ეს ფაქტი მეორე კანდიდატის - ლეონიდ თიბილოვის წარმომადგენლებმაც დააფიქსირეს და მას „ამომრჩეველთა პირდაპირი მოსყიდვა უწოდეს“.
იმავე თიბილოვის შტაბმა გაავრცელა ინფორმაცია, რომ ვლადიკავკაზი-ცხინვალის მაგისტრალზე უცნობი პირები, კონკრეტული კანდიდატის მხარდაჭერის სანაცვლოდ,  ადამიანებს ფულს სთავაზობდნენ.
აშკარა დარღვევის ფაქტი, რომელზეც ვერავინ დახუჭა თვალი, ნომერ პირველი საარჩევნო უბნიდან ბიულეტენების გატაცება იყო, რის გამოც გამტაცებელი დააკავეს და 15-დღიანი ადმინისტრაციული პატიმრობაც მიუსაჯეს.
თუმცა მარიონეტული რეჟიმი არ აპირებს რაიმე ტიპის დარღვევა სერიოზულად განიხილოს და ე.წ. არჩევნებს შემდგარად და „დემოკრატიის უმაღლეს გამოვლინებად“  აფასებს.
Internet.ge