ვაშინგტონში აშშ-საქართველოს სტრატეგიული პარტნიორობის ქარტიის ფარგლებში დემოკრატიის სამუშაო ჯგუფის მე-5 შეხვედრა გაიმართა.

შეხვედრას საქართველოს მხრიდან თანათავმჯდომარეობდნენ საქართველოს ეროვნული უშიშროების საბჭოს მდივანი გიორგი ბოკერია და საგარეო საქმეთა მინისტრის მოადგილე სერგი კაპანაძე, ხოლო ამერიკული მხრიდან ევროპისა და ევრაზიის საკითხებში აშშ-ს სახელმწიფო მდივნის თანაშემწე ფილიპ გორდონი და სახელმწიფო მდივნის თანაშემწის მოადგილეები ერიკ რუბინი და ტომ მელია.

საგარეო საქმეთა სამინისტროს ინფორმაციით, მხარეებმა  საქართველოში განხორციელებული და მიმდინარე დემოკრატიული რეფორმების ფართო სპექტრი განიხილეს , მათ შორის, ცვლილებები საარჩევნო კანონმდებლობაში და 2012 წლის საპარლამენტო არჩევნებისათვის მზადების პროცესი.

„შეხვედრაზე ასევე განიხილულ იქნა საქართველო-აშშ-ს თანამშრომლობა „ღია მმართველობის პარტნიორობის" ინიციატივის ფარგლებში და საქართველოში განხორციელებული წარმატებული რეფორმების გამოცდილების გაზიარების შესაძლებლობა მსოფლიოს სხვადასხვა რეგიონებისათვის“,- ნათქვამია გრიგოლ ვაშაძის უწყების მიერ გავრცელებულ განცხადებაში.

Internet.ge