ევროკავშირმა საქართველოსთან თანამშრომლობის ახალი სქემა ჩამოაყალიბა, რომელიც 2014–დან 2020 წლამდე გაგრძლდება.

ამის შესახებ ევროკავშირის ელჩმა საქართველოში ფილიპ დიმიტროვმა „ქორთიარდ მერიოტში“ გამართულ კონფერენციაზე განაცხადა, რომელიც საქართველოში პოლიტიკური პროცესების მიმდინარეობას და სამომავლო პერსპექტივებს ეხება.

ელჩმა აღნიშნული კონფერენციის დიპლომატებისთვის დათმობილი ნაწილი გახსნა და საქართველოს და ევროკავშირის ურთიერთობებზე ისაუბრა. 

„ჩვენ ყოველთვის ვიყავით საქართველოს მიმართ მომთხოვნი და ეს ნიშნული კიდევ უფრო აიწევს მაღლა, ჩვენ გვწამს, რომ საქართველო ის ქვეყანაა, რომელსაც სურს მიუახლოვდეს ევროკავშირს, თქვენს ქვეყანას პესიმიზმის საფუძველი არ აქვს, ჩვენ ყოველთვის მივანიშნებდით, რომ საქართველოს დემოკრატიულ განვითარებასა და ევროკავშირისკენ სვლაზე დავიწყეთ მოლაპარაკებები თავისუფალი ვაჭრობისა და ასოცირების ხელშეკრულების შესახებ, ასევე ვიზის ლიბერალიზაციაზე და ეს მხოლოდ სიტყვები არ არის და ამის მატერიალიზაცია მოხდება“, - განახადა დიმიტროვმა.

მისივე თქმით, ევროკავშირი აგრძელებს ქვეყნის ფინანსურ დახმარებას, რომელიც წლიურად 670 მილიონ ევროს მოიცავს.

„თითქმის ჩამოვაყალიბეთ თანამშრომლობის ახალი სქემა, რომელიც 2014–დან 2020 წლამდე გაგრძელდება, 6–7 წელი მნიშვნელოვანი იქნება საქართველოსთვის, რათა გადადგას ნაბიჯი ევროკავშირში გაწევრიანების გზაზე“, – განაცხადა ფილიპ დიმიტროვმა.

რაც შეეხება ევროკავშირის მიერ ქვეყანაში რეფორმების მხარდაჭერას, ელჩის თქმით, ევროკავშირი გააგრძელებს პენიტენციალურ სისტემაში რეფორმების მხარდაჭერას, ასევე სოფლის მეურნეობის სფეროში, სადაც ახალი მთავრობის ინიციატივები მას გამხნევების საშუალებას აძლევს.

რაც შეეხება ქვეყანაში არსებულ კონფლიქტურ რეგიონებთან დაკავშირებულ სიტუაციას, თუკი ამ მიმართულებით დაემთხვევა ახალი ხელისუფლებისა და მისი ხედვები, თანამშრომლობა პროდუქტიული იქნება.

Internet.ge