საქართველოს საგარეო საქმეთა მინისტრის მოადგილის, ნინო კალანდაძის შეფასებით, საქართველოს ოკუპირებულ ტერიტორიებთან მიმართებაში, ტერმინი ოკუპაციის მართლზომიერება ეჭვქვეშ არასოდეს დამდგარა და არც არასოდეს დადგება. 

როგორც დღეს გამართულ ტრადიციულ ბრიფინგზე კალანდაძემ განაცხადა, ის, რაც საქართველოს ტერიტორიაზე ხდება, სრულად აკმაყოფილებს ოკუპაციის კრიტერიუმებს.

„ტერმინ ოკუპაციის გამოყენების მართლზომიერების საკითხი ეჭვქვეშ არ დადგება. ოკუპაცია სამართლებრივად გულისხმობს, როდესაც მოწინააღმდეგის ჯარი იმყოფება სუვერენული სახელმწიფოს ტერიტორიაზე და ამ ტერიტორიას მთლიანად ან თუნდაც ნაწილობრივ აკონტროლებს. ის, რაც საქართველოს ტერიტორიაზე ხდება, სრულად აკმაყოფილებს ოკუპაციის კრიტერიუმებს“,- განაცხადა კალანდაძემ.

შეგახსენებთ, რომ რუსეთი ჟენევის მოლაპარაკებების დროს ტერმინ ოკუპაციის გამოყენების მართლზომიერების საკითხის დასმას აპირებს.

Internet.ge