საქართველოს პრეზიდენტმა, რომელიც დუბაიში საერთაშორისო ენერგეტიკულ ფორუმს ესწრება, მსოფლიო ბანკის ახალ რეიტინგზე ისაუბრა, რომლის თანახმად, ბიზნესის კეთების სიმარტივით, საქართველომ მე-9 ადგილზე გადაინაცვლა.

მიხეილ სააკაშვილის განცხადებით, ის როგორც პრეზიდენტი გააგრძელებს საქართველოს პოპულარიზაციას, რათა ქვეყანაში კვლავაც ჩაიდოს ფული,  ჩამოვიდეს უფრო მეტი ბიზნესმენი, უფრო მეტი ტურისტი და ყოველივე ამის შედეგად, ქართველმა ხალხმა იცხოვროს უკეთესად.

„ჩვენი ქვეყნისთვის კიდევ ერთი, მთავარი რამ მოხდა - არის მსოფლიო ბანკის რეიტინგი ბიზნესის კეთების სიმარტივის თვალსაზრისით. მსოფლიოს ბანკს აქვს საკუთარი კრიტერიუმები იმის შესახებ, არის თუ არა მარტივი ბიზნესის კეთება საქართველოსა და, ზოგადად, მსოფლიოში. შევარდნაძის მთავრობის დროს ამ თვალსაზრისით 141 ადგილს ვიკავებდით, განხორციელებული რეფორმების შედეგად, გასულ წელს უკვე ვიყავით მე-16 ადგილზე გადავინაცვლეთ. მხოლოდ რამდენიმე პოსტსაბჭოთა ქვეყანა არის ასულში, საქართველო კი, ამ რეიტინგით, დღეს მე-9 ადგილზე იმყოფება. ამ მხრივ, ჩვენ გვისწრებს სინგაპური - მსოფლიოს ერთ-ერთი ყველაზე მდიდარი და წარმატებული ქვეყანა, ჰონკონგი, ახალი ზელანდია, ამერიკა, დანია, ნორვეგია, დიდი ბრიტანეთი და  სამხრეთ კორეის რესპუბლიკა. ამ ქვეყნებს მოსდევს საქართველო და შემდეგ  ავსტრალია. ეს არის რეალობა. რუსებს ჩვენზე 100-ჯერ მეტი ფული აქვს და მიუხედავად დიდი მცდელობისა და მთელი თავისი პროპაგანდის, ასეულშიც ვერ მოხვედრილა“,- განაცხადა სააკაშვილმა.

Internet.ge