საქართველოს საგარეო საქმეთა მინისტრმა, მაია ფანჯიკიძემ გაცნობითი შეხვედრა გამართა საქართველოში ევროკავშირის სადამკვირვებლო მისიის ხელმძღვანელთან, ანდჟეი ტიშკევიჩთან.

შეხვედრაზე მხარეებმა საქართველოსა და სადამკვირვებლო მისიას შორის თანამშრომლობის აქტუალური საკითხები განიხილეს.

საგარეო უწყების ინფორმაციით, ქართულმა მხარემ ხაზი გაუსვა მისიის საქართველოს ტერიტორიაზე საქმიანობის მნიშვნელობას და გამოთქვა მასთან ურთიერთობების გაღრმავების მზადყოფნა. შეხვედრაზე ასევე აღინიშნა ევროკავშირის სადამკვირვებლო მისიის როლი ჟენევის მოლაპარაკებების ფორმატში.

ევროკავშირის სადამკვირვებლო მისიის ხელმძღვანელმა მადლიერებით აღნიშნა სამინისტროსთან არსებული მჭიდრო თანამშრომლობა და წარმატებები უსურვა მინისტრს მომავალ საქმიანობაში.

internet.ge