პარლამენტის თავმჯდომარეს, დავით ბაქრაძეს ნატოსთან დაკავშირებით,  რუსეთის საგარეო უწყების ხელმძღვანელის, სერგეი ლავროვის გაღიზიანება არ უკვრის.

როგორც ჟურნალისტებს ბაქრაძემ განუცხადა, ბოლო სამი წლის განმავლობაში, რუსეთმა ყველაფერი გააკეთა იმისათვის, რომ საქართველოს არა მხოლოდ ევროატლანტიკური კურსისთვის გადაეხვია, არამედ საქართველოს როგორც თავისუფალ სახელმწიფოს აღარ ეარსება.

ბაქრაძის თქმით,  მისთვის ლავროვის ემოციები სრულიად გასაგებია.

„ლავროვი იმდენად გაღიზიანებული და იმედგაცრუებულია, რომ მან თავი საჯაროდაც კი ვერ შეიკავა, რომ არ დაეფიქსირებინა იმედგაცრუება. სწორედ, ეს არის იმის ნიშანი, რომ გავაგრძელოთ ქვეყნის განვითარება, ნატოში ინტერგაცია და ის კურსი, რომელიც წარმატებულია. ამის დასტურია ის ფაქტიც, რომ რუსეთს ფაქტიურად დინების წინააღმდეგ ცურვა მარტოს უწევს  და დღეს შეიძლება ითქვას, რომ ერთ მხარეს არის რუსეთი - ქვეყანა, რომელიც ოკუპაციას აგრძელებს და რომელიც ორი ქართული რეგიონის დამოუკიდებლობას ცნობს, ხოლო მეორე მხარეს კი, არის – მთელი დემოკრატიული სამყარო, რომელიც საქართველოს ტერიტორიულ მთლიანობას აღიარებს, რომელიც  საოკუპაციო ჯარის ჩვენი ქვეყნიდან გაყვანას მოითხოვს“, – განაცხადა ბაქრაძემ.

ბაქრაძის თქმით, ლავროვის გაღიზიანებას ის ფაქტიც განაპირობებს, რომ საქართველოს გამო, რუსეთს ყველა მნიშვნელოვან ფორმატში და ფორუმზე თავის მართლება უწევს.  

Internet.ge