ევროპის საბჭოს საპარლამენტო ასამბლეაში, საქართველოს დელეგაციის წევრის, პეტრე ცისკარიშვილის შეფასებით, ისეთ საკითხზე როგორიცაა, ოკუპირებულ ტერიტორიებზე ევროკავშირის სადამკვირვებლო მისიის შეშვება, დუმის დელეგაციის წევრებს უნდა შესწევდეთ უნარი საკუთარ ხელისუფლებაზე გავლენა მოახდინონ.

ამის შესახებ განცხადება, ცისკარიშვილმა  სტრასბურგში, ქართული და რუსული დელეგაციების ხელმძღვანელების შეხვედრის შემდეგ გააკეთა.

ცისკარიშვილის განცხადებით, ამ გავლენის მოხდენა იმისათვისაა საჭირო, რომ ქვეყნებმა შედარებით მსუბუქი ნაბიჯებით დაიწყონ ურთიერთობა.

„ისეთი საკითხის მოგვარება და კონკრეტული შედეგის მიღება, როგორიცაა ევროკავშირის სადამკვირვებლო მისიის შეშვება საოკუპაციო ზოლს მიღმა, წესით შესაძლებელი  უნდა იყოს სახელმწიფო დუმის დელეგაციისთვის. მათ უნდა შესწევდეთ უნარი მოახდინონ გავლენა საკუთარ ხელისუფლებაზე, რომ შედარებით მსუბუქი და რბილი ნაბიჯებით მაინც დავიწყოთ ურთიერთობა“,- განაცხადა ცისკარიშვილმა.

შეგახსენებთ, რომ სტრასბურგში ევროპის საბჭოს საპარლამენტო ასამბლეის საგაზაფხულო სესია იმართება, რომელშიც საქართველოს დელეგაციაც იღებს მონაწილეობას.

internet.ge