აფხაზეთის ავტონომიური რესპუბლიკის კონსტიტუციაში ცვლილებები შედის. ამის შესახებ „ინტერნეტ.ჯი“-ს აფხაზეთის უმაღლესი საბჭოს თავმჯდომარემ - ელგუჯა გვაზავამ განუცხადა. 

მისი თქმით, კონსტიტუციაში ცვლილებების შეტანის მიზანშეწონილობის საკითხის შემსწავლელი ჯგუფი მომავალ კვირას შეიქმნება.

„არსებული კონსტიტუცია ძალიან ძველია. 1979  წელს მიღებულ დოკუმენტში რიგი საკითხები დღეს არსებულ მდგომარეობასთან შესაბამისობაში არ მოდის. შეიქმნება ჯგუფი, რომელიც რეკომენდაციებს მოგვცემს, რის შემდეგაც, 10 მაისისთვის შეიძლება აფხაზეთის ავტონომიურ რესპუბლიკას ახალი კონსტიტუცია ჰქონდეს“,- განაცხადა გვაზავამ.

შეგახსენებთ, რომ გვაზავამ კონსტიტუციაში ცვლილებების შეტანის მიზანშეწონილობის საკითხის შემსწავლელი ჯგუფის შექმნის თაობაზე დადგენილებას 25 აპრილს მოაწერა ხელი.

internet.ge