რუსეთის ხელისუფლება ოპოზიციას ქუჩაში ხალხის გამოყვანაში გაეჯიბრება. ოპოზიციის მიერ 6 მაისს დაგეგმილ „მილიონების მარშს“ ვლადიმერ პუტინის მხარდამჭერ აქციას დაუპირისპირებენ, რომლის ჩატარებაც მოსკოვში დღეს იგეგმება. ხელისუფლების მხარდამჭერი აქციის გარდა მოსკოვში კიდევ 13 დემონსტრაცია გაიმართება - იუწყება რუსული მედია მოსკოვის მერიაზე დაყრდნობით.
თუმცა, ყველაზე მეტი რაოდენობის ადამიანს პროფკავშირების მოსკოვის ფედერაციის მიერ ორგანიზებულ და მმართველი პარტიის -„ედინაია როსიას“ მხარდამჭერ აქციაზე ელოდებიან. განაცხადში მითითებულია, რომ აქცია 100 000-კაციანი იქნება. ვარაუდობენ, რომ მასში მონაწილეობას მიიღებს დიმიტრი მედვედევიც. ცოტა ხნის წინ მან თავად განაცხადა, რომ დემონსტრაციაზე აუცილებლად მივა.

გარდა ამისა, აქციებს გამართავენ კომუნისტური, ლიბერალურ-დემოკრატიული პარტიების, ასევე „სპრავედლივაია როსიას“ მხარდამჭერები და ნაციონალისტები.

internet.ge