ამერიკელმა სენატორმა, ჯონ მაკკეინმა ვილნიუსის უნივერსიტეტში, დემოკრატიის თემაზე ლექცია წაიკითხა და საქართველოზეც ისაუბრა, - ამის შესახებ სააგენტო „რეგნუმი“ ლიტვურ მედიაზე დაყრდნობით წერს.   

კერძოდ, მაკკეინმა აღნიშნა, რომ საქართველომ მოახერხა, გზა გაეხსნა ნიჭიერი ადამიანებისთვის. სენატორმა ასევე აღნიშნა, რომ აშშ-მა უნდა შეაიარაღოს საქართველო, რათა საჭიროების შემთხვევაში, მან თავის დაცვა შეძლოს.

ჯონ მაკკეინი რუსეთის ახალი პრეზიდენტის თემასაც შეეხო და განაცხადა, რომ რუსეთში „ცვლილებათა ნიავი“ უბერავს და უკვე ბევრი რამ შეიცვალა კიდეც: „მხოლოდ თავად ვლადიმერ პუტინმა იცის, რა არის დაკავშირებული მის პოსტზე დაბრუნებასთან, მაგრამ მას საზოგადოების გაზრდილი თვითშემეცნების პირობებში მუშაობა მოუწევს… პუტინი, ნატო-სთან და ევროკავშირთან თანამშრომლობის პირობებში, უკვე პატივისცემას გამოიჩენს თავისი პატარა მეზობლების მიმართ“ - განაცხადა მაკკეინმა.

Internet.ge