ვაშინგტონში, ჯეიმსთაუნის ფონდში გამართულ შეხვედრაზე „ამერიკა, ევროპა და სამხრეთ კავკასია“, მთავარმა მომხსენებლებმა ანალიტიკომა ვლადიმირ სოკორმა და თავდაცვის კვლევების საერთაშორისო ცენტრის დირექტორმა, აშშ-ის ყოფილმა ელჩმა აზერბაიჯანში მეთიუ ბრაიზამ საქართველოზეც ისაუბრეს.

როგორც რადიო „ამერიკის ხმა“ იუწყება, სოკორმა აღნიშნა, რომ შეერთებული შტატები და მისი მოკავშირეები ახალი ტიპის საფრთხეებზე არიან გადართულები, რაც დასავლეთის ყურადღების შესუსტებას იწვევს სამხრეთ კავკასიაში. ამან კი სოკორის აზრით, შესაძლოა გამოუსწორებელი შედეგები გამოიღოს.

მისი განცხადებით, ამის დასტურია ის, რომ საქართველოს კვლავ ემუქრება აგრესიის საფრთხე. სოკორის თქმით, ის რომ კონფლიქტის სადემარკაციო ხაზებზე ევროკავშირის მონიტორინგის მისიაა განლაგებული, არ ნიშნავს ქვეყნის დაცვას, რადგან ეს არის სამოქალაქო მისია.  სოკორი აცხადებს, რომ საქართველოს სჭირდება შესაბამისი შეიარაღება, რათა თავი დაიცვას შესაძლო აგრესიისგან. ასევე, აუცილებელია საქართველოს სამხედრო ნაწილების გაწვრთნა ქვეყნის დასაცავად. „მართალია, ამერიკა ქართველ სამხედროებს წვრთნის, თუმცა მათი დანიშნულება არის შორეულ რეგიონებში ბრძოლა და არა ქვეყნის დაცვა,“ - აღნიშნა სოკორმა.

საქართველოს შესახებ, თავის გამოსვლაში, აზერბაიჯანში შეერთებული შტატების ყოფილმა ელჩმა მეთიუ ბრაიზამაც ისაუბრა: „ჩემთვის მიუტევებელია, რომ თითქმის ოთხი წელი გავიდა, როგორც პრეზიდენტი ობამა უწოდებს, საქართველოში რუსეთის შეჭრის შემდეგ და დღემდე, ჩვენ საქართველოს არ ვაძლევთ უფლებას შეიძინონ ის იარაღი, რომელიც მათ სჭირდებათ ასეთი შეტევების მოსაგერიებლად. რუსეთის ძალები განალაგებული არიან თბილისიდან 24 მილში, ზუსტად უმთავრესი საგზაო მაგისტრალის და რკინიგზის სიახლოვეს და ჩვენ დღემდე არ ვაძლევთ საქართველოს იარაღის შეძენის უფლებას,“ - ციტირებს ბრაიზას რადიო „ამერიკის ხმა“.

Internet.ge