მმართველი გუნდის წევრის, დეპუტატ ხათუნა გოგორიშვილის პირადი პოზიციაა, რომ პლენარული სხდომები 12:00 საათზე დაიწყოს.  თუმცა, დეპუტატის თქმით, თუ კომიტეტი ამ საკითხის გამო უმცირესობაში აღმოჩნდება, შენიშვნა გაზიარებული იქნება.

როგორც ჟურნალისტებს გოგორიშვილმა განუცხადა, ახალ რეგლამენტთან დაკავშირებით, ყველა შენიშვნისა და ყველა არგუმენტისადმი კომიტეტი ღიაა.

მისი თქმით,  როდესაც, კომიტეტში ამ საკითხის შესახებ იმსჯელეს, მთავარ პრინციპად აიღეს ის, რომ პარლამენტს სამუშაო საათების რაოდენობა იმდენივე უნდა ჰქონდეს, რამდენიც დღეს აქვს.

„არავისთვის არ არის დასამალი, რომ ქუთაისში ადამიანებს სხვადასხვა რაიონებიდან, ასევე თბილისიდან მოუწევთ სიარული. მაქვს ძველი პარლამენტების გამოცდილება, რომ ნახევარზე მეტის საცხოვრებელი ადგილი თბილისია. თუ დღეს 60–მდე დეპუტატს უწევს რაიონებიდან თბილისში სიარული, მომავალ პარლამენტში ვეჭვობ, რომ ქუთაისში ჩასვლა გაცილებით მეტს მოუწევს. არც ერთი ნორმის შესახებ კატეგორიული დამოკიდებულება არ გვაქვს. უბრალოდ, რა თქმა უნდა, გამოხატვის ფორმას მნიშვნელობა აქვს, განსაკუთრებით ჩემი კოლეგების მხრიდან. ყველა მოსაზრება აღელვების გარეშე შეუძლიათ ქაღალდზე გადაიტანონ და ჩვენ აუცილებლად განვიხილავთ. ყველას ვთხოვდი, რომ არა მხოლოდ ერთ კონკრეტულ მუხლს მიაქციონ ყურადღება, არამედ თავიდან ბოლომდე წაიკითხონ პროექტი“, – განაცხადა დეპუტატმა.

კანონმდებლის შეფასებით, თუ კომიტეტი ამ საკითხის შესახებ უმცირესობაში აღმოჩნდა, შენიშვნა გაზიარებული იქნება.

„თუ აღმოჩნდა, რომ ბობოხიძე და მისი მომხრეები აღმოჩნდებიან უმცირესობაში, მაშინ პროექტში შეტანილი ნორმა დარჩება. თუმცა, ამ საკითხის შესახებ საუბარი, ჯერ-ჯერობით, ადრეა“, – დასძინა მან.

შეგახსენებთ, რომ დღეს, აკაკი ბობოხიძემ პლენარული სხდომების ერთი საათით წინ გადაწევა გააპროტესტა.

ახალი რეგლამენტის პროექტის მიხედვით, მომავალ პარლამენტში სხდომები ერთი საათით გვიან დაიწყება. ცვლილებებით, სხდომა ორშაბათსა და პარასკევს გაიმართება, რომელიც 11 საათის ნაცვლად, 12:00 საათზე დაიწყება. 

Internet.ge