"რუსეთი, კვლავაც მზად არის დაეხმაროს აფხაზეთს სოციალური პრობლემებისა და უსაფრთხოების საკითხების მოგვარებაში," - განაცხადა ვლადიმერ პუტინმა სოჭში, აფხაზეთის მარიონეტული რეჟიმის ლიდერთან ალექსანდრე ანქვაბთან შეხვედრისას.

“უსაფრთხოების საკითხებზე უფრო დეტალურად ჩვენ მოგვიანებით ვისაუბრებთ,” - აღნიშნა პუტინმა შეხვედრის დაწყებისას.

„რია ნოვოსტის“ ცნობით, რუსეთი აფხაზეთს კიდევ უფრო მეტ მხარდაჭერას დაჰპირდა: „აფხაზეთის, როგორც დამოუკიდებელ სახელმწიფოდ ჩამოყალიბების მიმართულებით, გასულ წლებში, ბევრი რამ გაკეთდა, მაგრამ კიდევ უფრო ბევრი უნდა გაკეთდეს. მე ვიცი, რომ პრობლემები საკმარისია. დღეს, ჩვენ ერთ-ერთი მათგანის წინსვლა ვნახეთ,“ - განაცხადა პუტინმა, რომელსაც, როგორც ჩანს, საქართველო-რუსეთის საზღვრის ფსოუს მონაკვეთზე შედარებით გამარტივებული მიმოსვლა ჰქონდა მხედველობაში.

თავის მხრივ, ანქვაბმა ვლადიმერ პუტინს გაპრეზიდენტება მიულოცა და იმედი გამოთქვა, რომ „ამის შემდეგ, საქმეები უფრო კარგად წავა, ვიდრე ეს მანამდე იყო“.

Internet.ge