კოალიცია „ქართული ოცნების“ პრესსპიკერის მაია ფანჯიკიძის განცხადებით, მან გერმანიაში კონრად ადენაუერის ფონდის მიერ საქართველო-გერმანიის დიპლომატიური ურთიერთობების აღდგენის 20 წლისთავთან დაკავშირებით დაგეგმილ ღონისძიებაში მიიღო მონაწილეობა, სადაც პარლამენტის თავმჯდომარე დავით ბაქრაძე სიტყვით გამოვიდა.

როგორც დღეს, გამართულ პრესკონფერენციაზე ფანჯიკიძემ განაცხადა, მას ვიზიტისას ისეთი შთაბეჭდილება დარჩა, რომ საქართველოს ხელისუფლების წარმომადგენლები სიმართლის იმ ვერსიას ავრცელებენ, რომელიც მათთვისაა ხელსაყრელი.

მისი თქმით, განსაკუთრებული სიმძაფრით ხდება იმ საკითხების პროპაგანდა, რაც ხელისუფლებას როგორც დემოკრატიულს, როგორც სამართლიანს და როგორც ქვეყანაზე მზრუნველს წარმოაჩენს.

„მე მომეცა საშუალება, რომ ბაქრაძის გამოსვლის შემდეგ, საზოგადოებისთვის ის ვითარება გამეცნო, რომელიც საქართველოში რეალურად ხდება. ამ ყველაფერმა მმართველი გუნდის გაღიზიანება გამოიწვია. შემდეგ კი, უკვე სახელისუფლებო არხებით გაჟღერდა, რომ ოპოზიციის წარმომადგენლები, რომლებიც საზღვარგარეთ დადიან, საკუთარი გამოსვლებით აზიანებენ ქვეყანას და თითქოს ჩვენი განცხადებით, საქართველო ნატო-ში და ევროკავშირში ინტეგრაციას არ იმსახურებს. მინდა, ეს კატეგორიულად გავაპროტესტო“,- განაცხადა ფანჯიკიძემ.

პრესსიკერის განცხადებით, ოპოზიციის ლიდერების ვიზიტები  უცხოელ პარტნიორებთან სიმართლის მიტანას ემსახურება.

Internet.ge