მოსკოვი თბილისი-ვაშინგტონის ურთიერთობებს საგულდაგულოდ აკვირდება - ამის შესახებ რუსეთის საგარეო საქმეთა სამინისტროს ოფიციალურმა წარმომადგენელმა ალექსანდრ ლუკაშევიჩმა განაცხადა, რომელიც თავის ბრიფინგზე, საქართველოსა და აშშ-ის ურთიერთობების შეფასებისას, რაიმე ორიგინალურობით არ გამოირჩეოდა.
კერძოდ, მოსკოვისთვის კვლავ მტკივნეულ თემად რჩება თბილისსა და ვაშინგტონს შორის თანამშრომლობის საკითხი და ლუკაშევიჩმა სწორედ ეს „მტკივნეული მომენტები“ შეაჯამა:
„ჩვენ უკვე მივაქციეთ აშშ-ის სახელმწიფო დეპარტამენტის ყურადღება იმისკენ, რომ საქართველოს პორტებში გახშირდა აშშ-ის სამხედრო-საზღვაო ძალების გემების შესვლა, რომლებიც აღჭურვილია „იჯისის“ სისტემებით. გასაგებია, რომ ეს საქართველოს ხელისუფლების მიერ აღიქმება, როგორც მისი რევანშისტული მისწრაფებების წახალისება...
ნებისმიერი სამხედრო თანამშრომლობა თბილისთან, კავკასიაში მშვიდობასა და უსაფრთხოებაზე მძიმე შედეგებით აისახება. ამ თვალსაზრისით ვაგრძელებთ ზედმიწევნით თვალის დევნებას ამერიკულ-ქართული თანამშრომლობის კონკრეტულ ფორმებზე - თავდაცვისა და უსაფრთხოების სფეროში. სწორედ ამ კონტექსტში განვიხილავთ საქართველოს ტერიტორიაზე ჩატარებულ ამერიკულ-ქართულ საველე სწავლებას, რომელიც 10-24 მარტს შედგა…
თბილისის მონაწილეობა ავღანეთის მშვიდობის შენარჩუნების ოპერაციაში აღიქმება, როგორც საქართველოს რემილიტარიზაციის გაგრძელება და როგორც საბაბი, რათა თავის ქვეყანას ნატო-ში უბიძგონ. მნიშნვნელოვნად ვთვლით, რომ შეიარაღება, რომელსაც ავღანეთში მყოფი ქართული კონტინგენტი იყენებს, არ მოხვდეს საქართველოში“ - ამბობს ლუკაშევიჩი.
თავისი შიშების მიზეზად მოსკოვი ოკუპირებული აფხაზეთისა და ცხინვალის რეგიონის უსაფრთხოებაზე ზრუნვას ასახელებს და „ზომებს იღებს“, რათა აღნიშნული იარაღი თბილისმა „აფხაზეთისა და სამხრეთ ოსეთის წინააღმდეგ, მათ შორის, ამ ქვეყნებში მცხოვრები რუსეთის მოქალაქეების წინააღმდეგ არ გამოიყენოს“.
Internet.ge
