საგარეო ურთიერთობათათა კომიტეტის თავმჯდომარის, აკაკი მინაშვილის განცხადებით, რუსეთის მიერ დაგეგმილ წვრთნებს „კავკაზ 2012“–ს საქართველო საერთაშორისო თანამეგობრობასთან ერთად ყურადღებით აკვირდება.

როგორც ჟურნალისტებს მინაშვილმა განუცხადა, წვრთნები ტარდება, არა მხოლოდ ჩრდილოეთ კავკასიაში, არამედ ოკუპირებულ ტერიტორიებზე, რაც საერთაშორისო ნორმების დარღვევაა.

მისი თქმით, ასეთი პოზიცია საქართველოსთან ერთად, საერთაშორისო თანამეგობრობასაც აქვს და მხარეები ამ პროცესს ყურადღებით აკვირდებიან.

„განსაკუთრების იმის გამო ვაკვირდებით, რომ წვრთნები სექტემბრის მეორე ნახევარში იმართება და საქართველოში ჩასატარებელ არჩევნებს წინ უსწრებს. პარტნიორებთან ინტენსიურად ვმუშაობთ, რათა წვრთნების შესახებ ინფორმაცია მივაწოდოთ“, – განაცხადა მინაშვილმა.

შეგახსენებთ, გუშინ, რუსეთის შეირაღებული ძალების გენერალური შტაბის უფროსმა, ნიკოლაი მაკაროვმა განაცხადა, რომ სტრატეგიული სამხედრო წვრთნები „კავკასია-2012“, რომელიც 17-23 სექტემბერს არის დაგეგმილი, არ არის მიმართული რომელიმე ქვეყნის წინააღმდეგ.   მისი თქმით, ეს სწავლება რუსეთის შეიარაღებული ძალების მოსამზადებელი გეგმის მიხედვით ტარდება და მისი მიზანი ჯარისკაცების პრაქტიკული გადამზადებაა.

Internet.ge