კოალიაცია „ქართული ოცნების“ ლიდერი ბიძინა ივანიშვილი პარლამენტის მიერ დღეს მიღებულ საკონსტიტუციო ცვლილებას ეხმაურება და საქართველოს პრეზიდენტს ღია წერილით მიმართავს. ბიზნესმენი მიხეილ სააკაშვილს საკონსტიტუციო ცვლილების არ დამტკიცებისკენ მოუწოდებს და ამბობს, რომ სააკაშვილი კონსტიტიიაში შეტანილი ცვლილებების ბოიკოტით ქვეყნის პრესტიჟს გადაარჩენს.

„მოგმართავთ, არ მოაწეროთ ხელი კონსტიტუციურ ცვლილებებს. ამით თქვენ გადაარჩენთ ქვეყნის პრესტიჟს და მის კონსტიტუციურ ფუნდამენტს, რომელიც შეუდარებლად მაღალი ღირებულებაა, ვიდრე თქვენი, ჩემი და ყველა პოლიტიკური ძალის აწმყო თუ მომავალი, ერთად აღებული. ამასთანავე, მე არ ვაპირებ ახირებაში გაგეჯიბროთ და მზად ვარ მოგცეთ დაშვებული შეცდომების გამოსწორების კიდევ ერთი საშუალება - ორმაგი მოქალაქეობის მისაღებად მოგმართოთ ისეთი განცხადებით, რომელზეც  თქვენი პოლიტიკური გუნდის წევრები და საჯარო მოხელეები მიუთითებენ“,- ნათქვამია წერილში.

ივანიშვილი მიმართავში აღნიშნავს, რომ მისი თხოვნის შეუსრულებლობის შემთხვევაში აღნიშნული კონსტუტუციით არ ისარგებლებს.

„თუ არ გაითვალისწინებთ ჩემს რჩევას და უარს არ იტყვით კონსტიტუციურ ცვლილებებზე, მაშინ მე არ გავხდები ანტისახელმწიფოებრივი ქმედების თანამონაწილე, არ ვისარგებლებ აღნიშნული კონსტიტუციური ცვლილებებით და არ მივიღებ მონაწილეობას საპარლამენტო არჩევნებში; გავაგრძელებ აქტიურ საზოგადოებრივ და პოლიტიკურ საქმიანობას იმ ფარგლებში, რასაც საქართველოს კონსტიტუცია ადგენს საქართველოში მცხოვრები უცხო ქვეყნის მოქალაქისთვის - მირჩევნია, კანონის ზღვარზე ვიარო, ვიდრე თქვენთან ერთად გავიდე ანტისახელმწიფოებრივ და  ანტიკონსტიტუციურ სივრცეში“,- მიიჩნევს ივანიშვილი და აქვე დასძენს, რომ აღნიშნული გადაწყვეტილება ქვეყანას სჭირდება.

„იმედს ვიტოვებ, რომ თქვენ, თქვენი გუნდის წევრები და თქვენი მრჩევლები მოუხმობთ კეთილგონიერებას და სწორ გადაწყვეტილებებს მიიღებთ. ეს გადაწყვეტილებები მე არ მჭირდება, ქვეყანას სჭირდება“,- ნათქვამია ღია წერილში რომელიც ბიძინა ივანიშვილის ოფიციალური გვერდით გავრცელდა.

internet.ge