„ქრისტიან-დემოკრატიული მოძრაობის“ ლიდერი, გიორგი თარგამაძე საკონსტიტუციო ცვლილებებთან დაკავშირებით ბიძინა ივანიშვილის გადაწყვეტილებას 27 მაისის ქუჩის აქციას უკავშირებს.

როგორც ჟურნალისტებს თარგამაძემ განუცხადა, მისმა გუნდმა მაქსიმუმი გააკეთა და საპარლამენტო უმრავლესობამ საკონსტიტუციო ცვლილებები დაამტკიცა, რომლითაც პოლიტიკური გამოსავალი იქნა ნაპოვნი, კერძოდ, ძირითად მოთამაშეებს არჩევნებში ჩართვის უფლება და მაღალი თანამდებობების დაკავების საშუალება ექნებათ.

თარგამაძის თქმით, ვინ როგორ მიიღებს ამ ცვლილებებს, ეს მათი გადასაწყვეტია, თუმცა ივანიშვილის განცხადება ეფექტის მატარებელი არ არის.

თარგამაძის თქმით, ბიძინა ივანიშვილის გუნდი ფიქრობს, რომ ამ ცვლილებებით ხელისუფლებამ უკან დაიხია და ილუზია აქვთ, რომ მმართველ გუნდს კიდევ უკან დაახევინებენ.

„ამ ილუზიებისგან მე შორს ვარ. ხელისუფლება არაფრის დამთმობი აღარ არის, აგერ ბურთი და მოედანი, ვნახავთ, ვინ რას გააკეთებს,“- დასძინა მან.

დეპუტატის მოსაზრებით, ივანიშვილის მიერ მიღებული გადაწყვეტილება 27 მაისს დაგეგმილ ქუჩის აქციას უკავშირდება.

„როგორც ჩანს, მათ პოლიტიკური ტემპერატურის აწევა სურთ, და ეს გასაგებია, მაგრამ გრძელვადიანი პოლიტიკის თვალსაზრისით, ეს გადაწყვეტილება მომგებიანი არ არის, სჯობს დაპირისპირება ერთმანეთთან გაარკვიონ“,-განაცხადა თარგამაძემ.

Internet.ge