საქართველოსა და ესპანეთის სამეფოს შორის დიპლომატიური ურთიერთობების დამყარების 20 წლისთავთან დაკავშირებით, საქართველოს საგარეო საქმეთა სამინისტროს დელეგაცია, ესპანეთში იმყოფებოდა.

დელეგაციის ორდღიანი ვიზიტი, მინისტრის მოადგილის, ნინო კალანდაძის ხელმძღვანელობით შედგა და დღეს დასრულდა.

დელეგაციამ შეხვედრები გამართა ესპანეთის საგარეო საქმეთა და თანამშრომლობის სამინისტროს საგარეო პოლიტიკის, გლობალური, მრავალმხრივი და უსაფრთხოების საკითხების გენერალურ დირექტორთან, სანტიაგო კაბანასთან, ესპანეთის სამეფოს კონგრესის დეპუტატებთან, მმართველი „სახალხო პარტიის“ წარმომადგენელთან, კონგრესის საკონსტიტუციო კომიტეტის სპიკერსა და ეუთო-ს საპარლამენტო ასამბლეაში ესპანეთის დელეგაციის ხელმძღვანელ, პედრო გომეს დე ლა სერნასთან,  ასევე, კონგრესის ევროკავშირის საქმეთა კომიტეტის სპიკერთან, სოციალისტური პარტიის ფრაქციიდან, ხუან მოსკოსოსთან.

შეხვედრებზე საქართველოსა და ესპანეთის სამეფოს შორის ორმხრივი პოლიტიკური, ეკონომიკური და კულტურული ურთიერთობების ფართო სპექტრი განიხილეს. ხაზი გაესვა ორ ქვეყანას შორის ეკონომიკური ურთიერთობების გაღრმავების აუცილებლობას და ამ მიმართულებით თანამშრომლობის სამომავლო პერსპექტივებს. ასევე, საუბარი შეეხო რეგიონული და საერთაშორისო მნიშვნელობის აქტუალურ საკითხებს, საქართველო-ევროკავშირის ურთიერთობების დინამიკას, საქართველო-ნატო-ს თანამშრომლობას და საქართველოში მიმდინარე პროცესებს.

ესპანურმა მხარემ, კიდევ ერთხელ დაადასტურა ურყევი მხარდაჭერა საქართველოს ტერიტორიული მთლიანობისა და ქვეყნის ევროპულ და ევროატლანტიკურ სტრუქტურებში ინტეგრაციის მისწრაფებისადმი.

internet.ge