"რუსეთის საგარეო საქმეთა სამინისტრომ შეშფოთება გამოხატა საქართველოსთან დაკავშირებით ნატოს მიერ მიღებული გადაწყვეტილების გამო" - იუწყება რუსული მედია. 

„ალიანსმა ვერ გამოიტანა პრინციპული დასკვნები 2008 წლის ტრაგიკული მოვლენებიდან,“ - განაცხადა საგარეო უწყების ოფიციალურმა წარმომადგენელმა ალექსანდრ ლუკაშევიჩმა დღეს გამართულ ბრიფინგზე.

„ერთ-ერთი ასეთი რთული საკითხი არის სიტუაცია სამხრეთ კავკასიაში, - აფხაზეთს, სამხრეთ ოსეთსა და საქართველოს შორის კეთილმეზობლური ურთიერთობების უზრუნველყოფასთან დაკავშირებით,“ - განაცხადა ლუკაშევიჩმა და დასძინა, რომ ამ კონტექსტში ოფიციალური მოსკოვი „მწუხარებით და შეშფოთებით აღიქვამს ჩიკაგოს ნატოს სამიტის იმ ელემენტებს, რომლითაც ნატო ადასტურებს ყველა ადრე მიღებულ გადაწყვეტილებას საქართველოსთან მიმართებაში და მოუწოდებს რუსეთს, გადახედოს აფხაზეთისა და სამხრეთ ოსეთის აღიარების გადაწყვეტილებას“.

შეგახსენებთ, ნატოს ჩიკაგოს სამიტზე მიღებულ იქნა დეკლარაცია, რომელშიც ჩაიწერა, რომ ალიანსი კვლავაც ითხოვს რუსეთისაგან აფხაზეთისა და სამხრეთ ოსეთის დამოუკიდებლობის გადაწყვეტილების გაუქმებას და მხარს უჭერს საქართველოს სწრაფვას ნატოში.

Internet.ge