ოფიციალური თბილისი გალის რაიონის სოფელ ჭუბურხინჯში, რუსი სამხედროებისათვის სამხედრო ქალაქის მშენებლობის საკითხზე, საერთაშორისო თანამეგობრობას რეაგირებისკენ მოუწოდებს.  

როგორც საგარეო საქმეთა სამინისტროში გამართულ ბრიფინგზე მინისტრის მოადგილე ნინო კალანდაძემ განაცხადა, ოკუპირებულ რეგიონში სამხედრო შიარაღების ზრდა მიმდინარეობს.

„აღნიშნულ საკითხზე ჩვენ რეაგირება შეგვიძლია მოვახდინოთ იმ კუთხით, რომ საერთაშორისო პარტნიორები ჩავაყენოთ საქმის კურსში.  მივმართავთ ცივილიზებული სამყაროს წარმომადგენლებს  ყურად იღონ და შესაბამისად, სიფრთხილით მოეკიდონ მსგავს ქმედებებს“,- განმარტა ნინო კალანდაძემ.

მისი თქმით, საგარეო უწყებამ შვეიცარიის საელჩოს შუამავლობით, რუსეთს საპროტესტო ნოტა გაუგზავნა.

„რუსეთის ფედერაციას რუტინულად  ვუგზავნით საპროტესტო ნოტას რომელიც ტრადიციულად უპასუხოდ რჩება, რადგან ამ შეიარაღების ზრდა სწორედ რუსეთის ინტერესებში შედის“,- დასძინა მინისტრის მოადგილემ.

Internet.ge