საფრანგეთის პრეზიდენტისთვის სირიაში სამხედრო ჩარევა მისაღებია, ოღონდ მხოლოდ გაეროს თანხმობის შემდეგ. ამის შესახებ ფრანსუა ოლანდმა ტელეარხ „ფრანს 2“-ის ეთერში განაცხადა.

„სამხედრო ჩარევა გამორიცხული არაა, მაგრამ ეს მხოლოდ ერთი პირობით მოხდება: ის უნდა შეესაბამებოდეს საერთაშორისო ნორმებს, ანუ, სანქცირებული უნდა იყოს გაეროს უშიშროების საბჭოს მიერ,“ - განაცხადა ოლანდმა.

ამასთან, პრეზიდენტმა აღნიშნა, რომ „სირიის პრობლემის გადაწყვეტა სამხედრო გზით არაა აუცილებელი“. მისი თქმით, „უნდა მოინახოს სხვა გამოსავალი - აუცილებელია სანქციების გამკაცრება“.

ოლანდი ამ საკითხს ვლადიმერ პუტინთან ერთად განიხილავს, რომელიც პარიზს პარასკევს ეწვევა. სწორედ რუსეთს და ჩინეთს „აქვთ მეტ-ნაკლებად თავშეკავებული პოზიცია სანქციებთან დაკავშირებით,“- აღნიშნა მან.

აღსანიშნავია, რომ აშშ კონფლიქტის შემდგომი მილიტარიზაციის წინააღმდეგია, თუმცა არც ამერიკული მხარე გამორიცხავს მოქმედების რომელიმე ვერსიას. ამის შესახებ თეთრი სახლის პრეს-მდივანმა ჯეი კარნიმ გუშინ განაცხადა.

Internet.ge