აშშ სწავლობს ინფორმაციას რუსულ გემთან დაკავშირებით, რომელიც სირიის პორტ ტარტუსში შევიდა და ითხოვს რუსეთისგან, თავი შეიკავოს ბაშარ ასადის რეჟიმისთვის იარაღის მიწოდებისგან, - განაცხადა სახელმწიფო დეპარტამენტის წარმომადგენელმა მარკ ტონერმა, - იუწყება „რია ნოვოსტი“.

უფლებადამცველი ორგანიზაციის „ Human Rights First “-ის წარმომადგენელმა გაეროში ჟურნალისტებს განუცხადა, რომ სავარაუდოდ, სირიის პორტ ტარტუსში შევიდა იარაღით დატვირთული გემი, რომელზეც რუსეთის სამხედრო-საზღვაო ძალების მატერიალურ-ტექნიკური უზრუნველყოფის პუნქტია განთავსებული.

„მე ვნახე ეს ინფორმაცია, მას ვსწავლობთ. თქვენ იცით ჩვენი პოზიცია იარაღის მიწოდებასთან დაკავშირებით - ჩვენ ვთვლით, რომ ყველა ქვეყანამ უნდა შეწყვიტოს ასადის რეჟიმისადმი სამხედრო დახმარება. ჩვენ მუდმივად გამოვთქვამთ შეშფოთებას რუსეთის ხელისუფლების მიმართ, როგორც საჯაროდ, ისე პრივატულად“ - განაცხადა ტონერმა ბრიფინგზე.

მისი თქმით, აშშ-მა ჯერ არ იცის, რა სახის ტვირთი ჩაიტანა სირიაში გემმა.

ეს პირველი შემთხვევა არ არის, როცა სირიაში იარაღით დატვირთული რუსული გემების შესვლის შესახებ ვრცელდება ინფორმაცია. მაგალითად, Human Rights First-ის ცნობით, რუსული გემი „პროფესორი კაცმანი“ მართლაც შევიდა 26 მაისს ტარტუსში და სირიის რეჟიმისთვის იარაღი ჩაიტანა.

Internet.ge