მოსკოვის პოლიციამ 120-მდე ადამიანი დააკავა, რომლებიც ტრიუმფის მოედანზე კონსტიტუციის დაცვის მოთხოვნით აქციას მართავდნენ. ამის შესახებ თავად რუსეთის შსს იტყობინება.

დაკავებულთა შორისაა ოპოზიციონერი და მწერალი, დაურეგისტრირებელი პარტია „სხვა რუსეთის“ ლიდერი ედუარდ ლიმონოვი.

შსს-ის პრეს-სამსახურის მიერ გავრცელებული ინფორმაციის თანახმად, „ოპოზიციურად განწყობილი მოქალაქეების ჯგუფი ცდილობდა ხელი შეეშალათ მეტროში შემსვლელ-გამომსვლელებისთვის“. გარდა ამისა, „არასანქრცირებულ ღონისძიებას ნაციონალისტებიც შეუერთდნენ,“ - აცხადებს სამინისტროს პრეს-სამსახური.

ოპოზიციონერები მიტინგის ჩატარებას შეკრების თავისუფლების დასაცავად აპირებდნენ, მერიამ კი ამ აქციის ჩატარებაზე თანხმობა არ განაცხადა.

Internet.ge