რუსეთის დუმამ, წუხელ, გვიან ღამით საბოლოოდ მიიღო კანონი, რომელიც საპროტესტო აქციების მოწყობას მნიშვნელოვნად შეუშლის ხელს და დაბრკოლებებს შეუქმნის.

241 ხმით 147-ის წინააღმდეგ მმართველი პარტია „ედინაია როსიას“ მიერ ინიცირებული კანონპროექტი დაამტკიცეს, რომელიც მიტინგების შესახებ კანონმდებლობის დარღვევისათვის კოლოსალურ ჯარიმებს 150 ათასი რუბლიდან 1 მილიონ რუბლამდე ითვალისწინებს.

აღნიშნული კანონის თანახმად, ისეთი აქციისა ან მსვლელობის მოწყობა, როგორიც რუსეთის ოპოზიციამ მოსკოვში ცოტა ხნის წინ ჩაატარა - „მილიონების მარში“ ან „სახალხო სეირნობა“, ორგანიზატორებს, ამიერიდან მილიონი რუბლი დაუჯდებათ.

დუმის ოპოზიციამ კანონპროექტი გააპროტესტა. „სპრავედლივაია როსიამ“ სხდომათა დარბაზი დატოვა და შენობასთან შეკრებილ რამდენიმე ასეულ აქტივისტს შეუერთდა, რომელიც ასევე წინააღმდეგნი არიან აღნიშნული კანონისა.

აღსანიშნავია, რომ ოპოზიცია 12 ივნისს მოსკოვში ისევ გეგმავს მასშტაბური აქციის მოწყობას. ამ დროისთვის კი კანონი უკვე მოქმედებას დაიწყებს, რადგან ის ძალაში, ოფიციალურად გამოქვეყნებამდე შედის.

internet.ge