რუსეთის საგარეო საქმეთა სამინისტროს ოფიციალური წარმომადგენელი, ალექსანდრე ლუკაშევიჩი აცხადებს, რომ ჰილარი კლინტონის მიერ გამოცხადებული მხარდაჭერა ნეიტრალური პასპორტების საკითხთან დაკავშირებით, დღეს ჟენევაში დაგეგმილი დისკუსიებისთვის კონსტრუქციულ ატმოსფეროს არ ქმნის.

„ეს (ნეიტრალური პასპორტები) თავიდანვე კატეგორიულად უარყვეს ორივე რესპუბლიკაში, როგორც მათი დამოუკიდებლობისა და სუვერენიტეტის ხელყოფა. ცხადია, რომ ქალბატონი კლინტონის ხსენებული განცხადებები და თავად საკითხის ასე დაყენება სოხუმსა და ცხინვალში სრულიად გასაგებ ნეგატიურ რეაქციას იწვევს“ - განაცხადა ლუკაშევიჩმა ბრიფინგზე.

ლუკაშევიჩს კომენტარი სთხოვეს, კლინტონის კიდევ ერთ განცხადებაზე იმასთან დაკავშირებით, რომ იგი ვერ ხედავს გარანტიებს, რომ რუსეთი კვლავ არ დაიწყებს საქართველოსთან სამხედრო კონფლიქტს.

ლუკაშევიჩმა განაცხადა, რომ „2008 წელს რუსეთს აგრესორის მოთვინიერება მოუხდა, რადგანაც თბილისმა განახორციელა თავდასხმა სამხრეთ ოსეთზე, ჩვენს სამშვიდობოებზე და ჩვენ იძულებული ვიყავით ადექვატურად გვეპასუხა. სახელმწიფო მდივნის გამონათქვამებში ყველაფერი თავდაყირაა დაყენებული. იქმნება შთაბეჭდილება, რომ ჩვენი შეშფოთება და პოზიცია კვლავაც იგნორირებულია აშშ-ის ადმინისტრაციის მიერ იმ ნაწილში, რაც საქართველოში არსებულ სიტუაციას და 2008 წლის აგვისტოს მოვლენებს ეხება“.

ლუკაშევიჩის თქმით, კლინტონის განცხადებები საქართველოს ხელისუფლებას „კავკასიაში ახალი შეიარაღებული კონფლიქტების გაჩაღებაზე“ დამატებით წაახალისებს.

internet.ge