მმართველი გუნდის წევრი, ლაშა თორდია სამართალდამცველ ორგანოებს მიმართავს, „ქართული ოცნების“ ყუთები გაიხსნას, სადაც ე.წ. ოცნების ბარათები გროვდებოდა.

როგორც ჟურნალისტებს თორდიამ განუცხადა, კოალიციის აქტივისტები საზოგადოებას არჩევანი გაკეთების საშუალებას არ აძლევენ.

მისი თქმით, საზოგადოებამ არაერთხელ ნახა კოალიციის აქტივისტების მხრიდან ამომრჩეველთა მოსყიდვა, რაც სისხლის სამართლის დანაშაულს წარმოადგენს.

„რამდენიმე ადამიანი სისხლის სამართლის პასუხისგებაში იქნა მიცემული, მაგრამ „ქართული ოცნება“ თავისი ბარათების გამოყენებით იმავე ქმედების განხორციელებას აგრძელებს. იმედი მაქვს, სამართალდამცველი ორგანოები გამოძიების ფარგლებში  იმ ყუთებით დაინტერესდებიან, სადაც ეს ბარათები გროვდება და დეტალურად შეისწავლიან ბარათების შინაარსს. უნდა შევინარჩუნოთ ყველაზე ამოსავალი ფუძემდებლური პრინციპი ადამიანის უფლებისა – გააკეთოს არჩევანი“, - დასძინა კანონმდებელმა.

internet.ge