მომავალ კვირას, პარლამენტი „საარჩევნო კოდექსის“ პროექტს მეორე მოსმენით განიხილავს, რომლის მიხედვით, საერთაშორისო დამკვირვებელთა შერჩევის ახალი კრიტერიუმები ჩამოყალიბდება.

პარლამენტში წარდგენილ პროექტში აღნიშნულია, რომ სახელმწიფო ან ორგანიზაცია, რომელიც საქართველოში დამკვირვებელს გამოგზავნის, საქართველოს კანონმდებლობის, სუვერენიტეტის და ადამიანის უფლებათა საერთაშორისო ნორმების მიმართ პატივისცემას უნდა გამოხატავდეს.

ამასთან, მათ საარჩევნო პროცესის ხელშეშლისგან თავის შეკავება მოეთხოვებათ.

მისიებს ასევე მოეთხოვებათ ფინანსური დამოუკიდებლობა და დაფინანსების წყაროების გამჭირვალეობა.  

ცვლილებებით, სადამკვირვებლო მისიებს საერთაშორისო საარჩევნო დაკვირვების ძირითადი პრინციპების და დეკლარაციით აღიარებული დებულებების დაცვაც მოეთხოვებათ.

როგორც ჟურნალისტებს იურიდიულ საკითხთა კომიტეტის თავმჯდომარემ,  პავლე კუბლაშვილმა განუცხადა, პროექტში მინიმალური კრიტერიუმებია მოცემული, რომელსაც ნებისმიერი სადამკვირვებლო მისია დააკმაყოფილებს.

„შესაძლოა, რუსეთს საქართველოში დამკვირვებლების გამოგზავნისა და ვითარების არევის სურვილი გასჩენოდა. თუ სახელმწიფო საქართველოს სუვერენიტეტს და კანონმდებლობას არ აღიარებს, მით უმეტეს საქართველოს ტერიტორიები ოკუპირებული აქვს, საარჩევნო პროესში მისი მონაწილეობის მოტივაცია გასაგებია“, – აცხადებს კანონმდებელი.

საარჩევნო კოდექსში ტექნიკური ცვლილებაც შედის, რომლის თანახმად,  მთელი ქვეყნის მასშტაბით ერთი საერთაშორისო ორგანიზაციიდან მხოლოდ ერთი დამკვირვებელი შეიძლება იყოს წარდგენილი.

internet.ge