პრეზიდენტმა მიხეილ სააკაშვილმა პარლამენტს განსახილველად და დასამტკიცებლად ელჩების კანდიდატურები წარუდგინა.

ქვეყნის პირველი პირის გადაწყვეტილებით, საქართველოს ახალი ელჩი ეყოლება ცხრა ქვეყანაში.

პრეზიდენტის მიერ შვეიცარიის კონფედერაციაში საქართველოს საგანგებო და სრულუფლებიან ელჩად წარდგენილია – ირაკლი ყურაშვილი, სამხრეთ აფრიკის რესპუბლიკაში – ბექა დვალი, კანადასა და საერთაშორისო სამოქალაქო ავიაციის ორგანიზაციაში (იკაო) ალექსანდრე ლაცაბიძე, თურქეთის რესპუბლიკაში – ზურაბ პატარაძე, ინდონეზიის რესპუბლიკაში  – ზურაბ ალექსიძე,  არგენტინაში – გელა სეხნიაშვილი, ეთიოპიიის ფედერაციულ დემოკრატიულ რესპუბლიკაში – ვახტანგ ჯაოშვილი,  ბელარუსიის რესპუბლიკაში –  დავით კოტარია და ბულგარეთის რესპუბლიკაში – ლევან მეტრეველი.

აღნიშნული კანდიდატურების შესახებ, მიმდინარე კვირას, პარლამენტის საგარეო ურთიერთობათა კომიტეტი იმსჯელებს და საკანონმდებლო ორგანო კანდიდატურებს მომავალი კვირის სამშაბათის სხდომაზე დაამტკიცებს.

Internet.ge