„შემთხვევითი არაა, რომ მას შემდეგ, რაც ბუქარესტის სამიტზე ნატომ ალიანსში გაწევრიანების უფლება არ მისცა უკრაინასა და საქართველოს, რეგიონში არასასურველი პროცესები განვითარდა. ამიტომ ნატომ და ევროკავშირმა უფრო მეტი თანამიმდევრულობა უნდა გამოიჩინონ თავის პოლიტიკაში რეგიონის მიმართ“ - განაცხადა აზერბაიჯანის მილი მეჯლისის დეპუტატმა ასიმ მოალაზადემ 1news.az-თან საუბრისას.

მოლაზადე ბრიუსელში ჩატარებულ კონფერენციაში მონაწილეობდა, რომელზეც სამხრეთ კავკასიის ქვეყნების ევროატლანტიკურ სტრუქტურებში ინტეგრაციის საკითხებზე მსჯელობდნენ. შეხვედრაზე მან განაცხადა, რომ ინტეგრაციის დამაბრკოლებელი ფაქტორი გადაუჭრელი კონფლიქტებია და დასძინა, რომ მათი გადაწყვეტისთვის საერთაშორისო სამართლებრივი ნორმები გამოყენებული არ არის.
დეპუტატის თქმით, აზერბაიჯანისა და საქართველოსგან განსხვავებით, რომლებმაც ევროატლანტიკურ სტრუქტურებში ინტეგრაციისკენ აიღეს კურსი, სომხეთი, „თავისი აგრესიული პოლიტიკით, რეგიონში მადესტაბილიზებელ ფაქტორად იქცა“. ასევე აღნიშნა, რომ დასავლეთი, სამხრეთ კავკასიაში თავისი პოლიტიკის რეალიზებისას რუსეთს შეჰყურებს, რაშიც ის ბრიუსელში გამართული მსჯელობის პროცესშიც დარწმუნდა.