ვაშინგტონში აშშ-სა და საქართველოს შორის მრავალმხრივი დიპლომატიის შესახებ, კონსულტაციები გაიმართა. კონსულტაციებზე ქართულ მხარეს საგარეო საქმეთა მინისტრის მოადგილე სერგი კაპანაძე, ხოლო ამერიკულ მხარეს - აშშ-ს სახელმწიფო მდივნის თანაშემწე ესტერ ბრიმერი ხელმძღვანელობდა.

საქართველოსა და აშშ-ს მთავრობების მაღალი დონის წარმომადგენლებმა განიხილეს აშშ-საქართველოს შორის საერთაშორისო ორგანიზაციების კონტექსტში თანამშრომლობის გაღრმავების შესაძლებლობები, აგრეთვე ავღანეთში ეკონომიკური განვითარებისა და უსაფრთხოების კუთხით სამომავლო თანამშრომლობა.

საგარეო უწყების ინფორმაციით, მონაწილეები შეთანხმდნენ, გააუმჯობესონ გაეროსთან, ნიუ-იორკსა და ჟენევაში, აშშ-სა და საქართველოს მუდმივ წარმომადგენლობებს შორის კოორდინაცია და თანამშრომლობა სხვადასხვა საერთაშორისო და რეგიონულ ორგანიზაციებში. საკუთარი ეროვნული და საერთო ინტერესების უზრუნველსაყოფად საქართველოსა და აშშ-ს მთავრობები გააგრძელებენ მრავალმხრივი დიპლომატიის განხორციელებას.

internet.ge