სენატის საერთაშორისო საქმეთა კომიტეტმა ერთხმად დაუჭირა მხარი „მაგნიტსკის სიის“ - კანონპროექტს, რომელიც სავიზო სანქციების დაწესებას გულისხმობს იმ რუსი ჩინოვნიკების მიმართ, რომლებსაც 2009 წელს იურისტ სერგეი მაგნიტსკის მკვლელობასთან ჰქონდათ კავშირი - იუწყება უცხოური მედია.

სენატორებმა, ასევე, მხარი დაუჭირეს შესწორებას, რომლის თანახმადაც აშშ-ის ადმინისტრაცია ყოველწლიურად გადახედავს გასაიდუმლოებულ ინფორმაციას, კერძოდ, იმ პირთა სიას, რომლებზეც სანქციები უნდა გავრცელდეს.

პირებს, რომლებიც ამ სიაში არიან, ეკრძალებათ აშშ-ის საზღვრის გადაკვეთა, მათ შორის, იმ შემთხვევაშიც, თუ ეს ვიზა აღნიშნული კანონის მიღებამდე იქნა გაცემული. ასეთი ვიზები ანულირდება.

სავიზო სანქციების გარდა, კანონპროექტი ეკონომიკურ სანქციებსაც მოიცავს: სიაში მოხვედრილ პირთა ყველა საბანკო ანგარიში ამერიკულ ბანკებში გაიყინება.

Internet.ge