„ამომრჩეველთა ლიგის“ ერთ-ერთი დამფუძნებლის კოკა გუნცაძის განმარტებით, ორგანიზაცია არა ჩაკეტილი ტიპის პოლიტიკური პარტია, არამედ ღია საზოგადოებრივი მოძრაობაა, რომელმაც არჩევნებში გამჭირვალე, ობიექტურ და სამართლიან პროცესს უნდა შეუწყოს ხელი.

როგორც „ინტერნეტ.ჯი“-ს კოკა გუნცაძემ განუცხადა, ორგანიზაციის მთავარი მიზანი ქვეყანაში თავისუფალი, გამჭვირვალე და გაუყალბებელი არჩევნების ჩატარება იქნება.

ორგანიზაციას ამ დროისათვის უკვე შეუერთდნენ ძმები ლევან და გია გაჩეჩილაძეები, გოგა ხაინდრავა, კახა მიქაია, ზაზა პაპუაშვილი, გია ყარყარაშვილი, ბიძინა გეგიძე, გიორგი კობახიძე და ბასა ფოცხიშვილი. გუნცაძის განმარტებით მომავალში ორგანიზაციაში კიდევ ბევრი ცნობადი სახის გაწევრიანება იგეგმება.

„საზოგადოებრივ მოძრაობა „ამომრჩეველთა ლიგას“ ბევრი ცნობადი სახე შეუერთდება. ამ ეტაპზე მოლაპარაკებები საზოგადოებისათვის ცნობილ სახეებთან უკვე მიმდინარეობს, თუმცა კონკრეტული სახელებისა და გვარების დასახელებისგან ჯერჯერობით თავს შევიკავებ“,- განაცხადა გუნცაძემ.

მოძრაობა ასევე,  „სოლიდარობის ფონდის“ შექმნის იდეითაც გამოდის.  

„ჩვენ გამოვედით „სოლიდარობის ფონდის“ შექმნის იდეით. იმ შემთხვევაში თუ ეს იდეა გაზიარებული იქნება, „ამომრჩეველთა ლიგა“ ამ პროცესში აქტიურ მონაწილეობას მიიღებს. ფონდი კი დაეხმარება ყველას, ვინც იყო, არის ან მომავალში პოლიტიკური რეპრესიების მსხვერპლი გახდება“,- განაცხადა გუნცაძემ.

Internet.ge