დღეს, პარლამენტში პრემიერ-მინისტრობის კანდიდატს, ვანო მერაბიშვილსა და მინისტრობის კანდიდატებს ელიან.

პარლამენტის დღევანდელ რიგგარეშე სხდომაზე, ვანო მერაბიშვილი ნდობის გამოსაცხადებლად განახლებულ მინისტრთა კაბინეტის შემადგენლობასა და ახალ სამთავრობო  პროგრამას წარადგენს. მოგვიანებით კი, დღის მეორე ნახევარში, საპარლამენტო ფრაქციების „ნაციონალური მოძრაობის”, „ქრისტიან-დემოკრატებისა” და „ერთობა სამართლიაბისთვის“ წევრებს შეხვდება.

ოპოზიციონერი დეპუტატების განცხადებით, მათ აღმასრულებელი ხელისუფლების წარმომადგენლებთან ძალიან ბევრი შეკითხვა ექნებათ.

ბიუროს სხდომაზე, სამთავრობო პროგრამის ოფიციალურად დარეგისტრირების შემდეგ, მიმდინარე კვირას, საკომიტეტო მოსმენები გაიმართება, რის შემდეგაც პარასკევის რიგგარეშე სხდომაზე, დეპუტატები ახალ მინისტრთა შემადგენლობასა და პროგრამას დაამტკიცებენ.

შეგახსენებთ, რომ კონსტიტუციის თანახმად, პარლამენტი საქართველოს პრეზიდენტის მიერ მთავრობის შემადგენლობის წარდგენიდან ერთი კვირის ვადაში განიხილავს და კენჭს უყრის მთავრობის შემადგენლობისა და სამთავრობო პროგრამისთვის ნდობის გამოცხადების საკითხს. პარლამენტის ნდობის მისაღებად საჭიროა პარლამენტის სრული შემადგენლობის უმრავლესობის მხარდაჭერა. მთავრობის წევრები უნდა დაინიშნონ ნდობის გამოცხადებიდან სამი დღის ვადაში. ამასთან, პარლამენტი უფლებამოსილია ნდობა არ გამოუცხადოს მთავრობის შემადგენლობას და იმავე გადაწყვეტილებაში დასვას მთავრობის ცალკეული წევრის აცილების საკითხი. პრეზიდენტის მიერ აცილების შესახებ პარლამენტის გადაწყვეტილების გაზიარების შემთხვევაში დაუშვებელია აცილებული პირის მთავრობის იმავე შემადგენლობაში დანიშვნა მთავრობის გათავისუფლებული ან გადამდგარი წევრის ნაცვლად.

რაც შეეხება სამთავრობო ცვლილებებს, პრემიერ–მინისტრის თანანმდებობაზე ნიკა გილაური შინაგან საქმეთა მინისტრმა, ვანო მერაბიშვილმა, გასული კვირის შაბათს შეცვალა. ამასთან, დასაქმების მინისტრის აპარატი შეიქმნა, რომელსაც ბიზნესმენი პაატა ტრაპაიძე უხელმძღვანელებს.

პარლამენტმა საგაზაფხულო სესია 29 ივნისს რიგგარეშე სხდომით დახურა, მაგრამ სამთავრობო ცვლილებების დასამტკიცებლად მუშაობას ისევ რიგგარეშე ფორმატში განაგრძობს.

Internet.ge