შავი ზღვის ეკონომიკური თანამშრომლობის საპარლამენტო ასამბლეის იურიდიულ და პოლიტიკურ საკითხთა კომიტეტების ოცდამეცხრამეტე სხდომას, რუსეთის დელეგაცია არ ესწრება.

როგორც ჟურნალისტებს პარლამენტის ვიცე–სპიკერმა, მიხეილ მაჭავარიანმა განუცხადა, სხდომაზე, მიწვევის მიუხედავად, რამდენიმე ქვეყნის დელეგაცია არ იმყოფება და მათ შორისაა – რუსეთის დელეგაცია.

დეპუტატის ინფორმაციით, სხდომაზე, რუსეთის დელეგაცია იმიტომ, არ ჩავიდა, რომ მისი ხელმძღვანელი აფრიკაში იმყოფება.

„სერბეთში არჩევნებია, საბერძნეთში რთული ვითარებაა და ყველა, ვინც სხდომას არ ესწრება, ამის მიზეზი ჰქონდა. 12 ქვეყნიდან, სხდომაზე 6 ქვეყანაა წარმოდგენილი. შეიძლება ითქვას, რომ, როგორც წესი, კომიტეტის სხდომებზე, ასეთი დასწრებაა“, – განმარტავს დეპუტატი.

შეგახსენებთ, რომ კომიტეტების სხდომა, პარლამენტში ამ წუთებში მიმდინარეობს და მას, ასამბლეის იურიდიულ და პოლიტიკურ საკითხთა კომიტეტის თავმჯდომარის მოადგილე, სერჰი პოდჰორნი და მიხეილ მაჭავარიანი უძღვებიან.

შეხვედრებზე, მხარეები, ზღვის ეკონომიკური თანამშრომლობის საპარლამენტო ასამბლეის 2012 წელს დაგეგმილ ღონისძიებებს იხილავენ.

ამას გარდა, შეხვედრის მონაწილეები, შავი ზღვის ეკონომიკური თანამშრომლობის ორგანიზაციის ოცი წლის იუბილესთან დაკავშირებით, განცხადებას მიიღებენ.

კომიტეტების სხდომა, 5 აპრილამდე გაგრძელდება.

Internet.ge