მე-9 საერთაშორისო კონფერენცია "საქართველოს ევროპული გზა - ევროკავშირი და მისი ევროპელი მეზობლები” დღეს დასრულდება.

კონფერენცია ბათუმში გუშინ, ვიცე პრემიერ-მინისტრმა გიორგი ბარამიძემ გახსნა.

კონფერენციაში მონაწილეობენ: პრეზიდენტი მიხეილ სააკაშვილი, მოლდოვას რესპუბლიკის პრემიერ-მინისტრი ვლადიმირ ფილატი, გაფართოებისა და ევროპული სამეზობლო პოლიტიკის საკითხებში ევროკომისარი შტეფან ფულე, ევროპის სახალხო პარტიის პრეზიდენტი ვილფრედ მარტენსი, ევროკავშირის წევრი და პარტნიორი ქვეყნების, ასევე საქართველოს აღმასრულებელი და საკანონმდებლო ხელისუფლების მაღალი თანამდებობის პირები,  არასამთავრობო სექტორისა და საქმიანი წრეების წარმომადგენლები.

კონფერენცია ეძღვნება ევროკავშირის აღმოსავლეთ ევროპის სამეზობლოში ევროინტეგრაციის პროცესის პერსპექტივებს, მათ შორის, დემოკრატიულ რეფორმებსა და კანონის უზენაესობის საკითხებს, გლობალური და რეგიონალური უსაფრთხოების გამოწვევებს, ევროკავშირთან ეკონომიკურ თანამშრომლობასა და ხალხთა შორის კავშირებს. 

კონფერენციაზე ოთხი თემატური სესია მუშაობს:

I  სესიაზე-„დემოკრატიული რეფორმები და კანონის უზენაესობა“ - განიხილება აღმოსავლეთ ევროპაში დემოკრატიის წარმატების მნიშვნელობა და დემოკრატიული ტრანსფორმაციის გამოწვევები, დემოკრატიული განვითარების მნიშვნელოვანი ელემენტის - თავისუფალი და სამართლიანი არჩევნების საკითხი,  ასევე განიხილება მედიის თავისუფლების მნიშვნელობა და  სამოქალაქო საზოგადოების როლი.

II სესიაზე-„გლობალური უსაფრთხოების გამოწვევები“ - განიხილება  ევროპული ინტეგრაციის,  დემოკრატიის განვითარებისა და ეკონომიკური კეთილდღეობისათვის აღმოსავლეთ ევროპაში უსაფრთხოებისა და სტაბილურობის უზრუნველყოფის მნიშვნელობა, ძირითადი სადისკუსიო საკითხია ევროკავშირის როლი აღმოსავლეთ სამეზობლოში უსაფრთხოებისა და სტაბილურობის ხელშეწყობის თვალსაზრისით. 

III სესიაზე - „ევროკავშირთან ეკონომიკური ინტეგრაციის შესაძლებლობები“ - განიხილება ევროკავშირისა და აღმოსავლეთ პარტნიორობის ქვეყნებს შორის ეკონომიკური თანამშრომლობა და ევროკავშირში თანმიმდევრული ინტეგრაციის გზით ეკონომიკური მოდერნიზაციიის პერსპექტივები.  ასევე, ღრმა და ყოვლისმომცველი თავისუფალი ვაჭრობის ზონის, როგორც ეკონომიკური განვითარების ხელშემწყობი ფაქტორის მნიშვნელობა, ევროინტეგრაციასთან დაკავშირებულ რეფორმები  და პირდაპირი უცხოური ინვესტიციების მოზიდვის პერსპექტივები, ევროპის ენერგეტიკული უსაფრთხოების გაძლიერების საკითხები.

IV სესიაზე- „ხალხთა შორის კონტაქტები, როგორც ევროინტეგრაციის კატალიზატორი“-  განიხილება ერთა შორის თანამშრომლობის ისეთი მნიშვნელოვანი საკითხები, როგორიცაა კულტურა, განათლება და მეცნიერება; ხალხთა შორის კონტაქტების მნიშვნელობა კონფლიქტების გადაწყვეტის საკითხში; ადამიანთა თავისუფალი გადაადგილება, როგორც ერებს შორის ინტეგრაციის გაღრმავების აუცილებელი წინაპირობა.

internet.ge