რუსი პარლამენტარების დელეგაცია ვაშინგტონში იმყოფება. ვიზიტის მიზანია, დაარწმუნონ კოლეგა ამერიკელები, რომ იურისტ სერგეი მაგნიტსკის სიკვდილში რუს ჩინოვნიკებს ბრალი არ მიუძღვით. მოსკოვს ამ „აგიტაციით“ სურს თავიდან აიცილოს სანქციები, რომლებიც კონგრესში მხარდაჭერილი ე.წ. მაგნიტსკის სიით არის გათვალისწინებული.

რუსეთის ფედერაციის საბჭოს ოთხმა წევრმა ვაშინგტონში ჩაიტანა დოსიე - როგორც ცნობებშია ნათქვამი, მაგნიტსკის საქმეზე აქამდე უცნობი დოკუმენტებით, - იუწყება „რადიო თავისუფლება“, რომლის კორესპონდენტებიც ამ დოკუმენტებს უკვე გაეცნენ.  

რუსი პარლამენტარების თქმით, დოსიეში თავმოყრილი დოკუმენტები კითხვის ნიშნის ქვეშ აყენებს მაგნიტსკის წამებისა და მისი გარდაცვალების არაობიექტურად გამოძიების შესახებ ბრალდებებს. ნათქვამია აგრეთვე, რომ მაგნიტსკი ბოროტმოქმედი იყო.

სერგეი მაგნიტსკი 2009 წელს ციხეში მას შემდეგ გარდაიცვალა, რაც კორუფციაში დაადანაშაულა მაღალი რანგის ოფიციალური პირები. შეერთებული შტატების კონგრესი აპირებს, განიხილოს კანონპროექტი, რომელიც მაგნიტსკის სიკვდილთან კავშირის მქონე ოფიციალური პირების წინააღმდეგ სანქციებს ითვალისწინებს.

internet.ge