ეუთოს საპარლამენტო ასამბლეის მიერ საქართველოსთან დაკავშირებული რეზოლუციის მიიღება მოწმობს იმას, რომ ეუთოს არ სურს აღიაროს 2008 წლის შემდეგ კავკასიაში შექმნილი რეალიები, რაც ხელს უშლის რეგიონში მშვიდობასა და სტაბილურობას - ნათქვამია რუსეთის საგარეო საქმეთა სამინისტროს მიერ დღეს გავრცელებულ განცხადებაში.

საგარეო უწყება აღნიშნავს, რომ მონაკოში მიღებული რეზოლუცია პროპაგანდას უწევს „კლიშეს“ „ქართული ტერიტორიების ოკუპაციის შესახებ“.

„ასამბლეის დეპუტატების უმრავლესობას ამ დრომდე არ სურს ობიექტურად აღიქვას რეალიები კავკასიაში. ასეთი მიდგომა, სამწუხაროდ, ეუთოს ართმევს საშუალებას კონსტრუქციული წვლილი შეიტანოს რეგიონში მშვიდობისა და სტაბილურობის გამყარებაში“ - ნათქვამია ინფორმაციაში.

შეგახსენებთ, რომ აღნიშნული რეზოლუციის (მასში აფხაზეთი და ცხინვალის რეგიონი ოკუპირებულ ტერიტორიებადაა წოდებული) კენჭისყრისას, რუსეთის დელეგაციამ „თავი შეიკავა“ და „წინააღმდეგ“ არ მისცა ხმა, რამაც ოკუპირებული რეგიონების მარიონეტული რეჟიმების შეშფოთება გამოიწვია. ცხინვალმა და სოხუმმა ასეთი პოზიციის გამო მოსკოვისგან ოფიციალური ახსნა-განმარტებები მოითხოვეს.

internet.ge