ალექსანდრე ანქვაბი ნაციონალურ უმცირესობათა საკითხებში ეუთოს უმაღლეს კომისარს კნუტ ვოლებეკს შეხვდა. მანამდე ვოლებეკს შეხვედრები ჰქონდა არაღიარებული რესპუბლიკის ე.წ. საგარეო საქმეთა მინისტრთან და სხვა ჩინოვნიკებთან.

ხაზი გაუსვა რა თავის ნეიტრალურ სტატუსს, ვოლებეკმა განაცხადა, რომ არის საკითხები, რაზეც ერთად მუშაობა შესაძლებელია და მაგალითად აფხაზური საზოგადოების დაინტერესება მოიყვანა ენების შესწავლის კუთხით, რაზეც, როგორც „აპსნიპრესი“ იუწყება, ალექსანდრე ანქვაბმა განაცხადა, რომ „აფხაზეთში ენების შესწავლასთან დაკავშირებით პრობლემები არ არსებობს“.

„თითქმის ყველა პრობლემა აფხაზეთში უკავშირდება ომს, რომელიც საქართველომ გააჩაღა. ჩვენ გვჭირდება დახმარება ზარალის ანაზღაურების მხრივ, რომელიც ომმა მოგვაყენა. ყველაფერ დანარჩენს თავად გადავწყვეტთ,“ - განაცხადა ანქვაბმა და დასძინა, რომ ბოლო 7 წლის განმავლობაში საერთაშორისო ორგანიზაციების წარმომადგენლებთან ურთიერთობისას ექმნება შთაბეჭდილება, თითქოს არც ერთ მათგანს არ აქვს სერიოზული უფლებამოსილება და ისინი მხოლოდ ქართულ მხარეზე არიან დამოკიდებულები.