საქართველოს საგარეო საქმეთა მინისტრის მოადგილე სერგი კაპანაძე, ოფიციალური სამუშაო ვიზიტით კოლუმბიის რესპუბლიკაში იმყოფებოდა. საქართველოს დელეგაციის შემადგენლობაში ასევე წარმოდგენილი იყო საქართველოს საგანგებო და სრულუფლებიანი ელჩი კოლუმბიის რესპუბლიკაში ოთარ ბერძენიშვილი.

ვიზიტის ფარგლებში გაიმართა შეხვედრები კოლუმბიის საგარეო საქმეთა მინისტრის მოადგილესთან მონიკა ლანზეტა მუტისთან, ინფრასტრუქტურის მინისტრის მოადგილესთან მარია კონსტანცა გარსიასთან და ექსპორტის სტრატეგიული მხარდაჭერის დირექტორთან ოლგა ლუსია პერესთან.

შეხვედრებისას განხილულ იქნა საქართველოსა და კოლუმბიას შორის ორმხრივი ურთიერთობების განვითარების საკითხები ეკონომიკის, ვაჭრობის, სოფლის მეურნეობის, ინფრასტრუქტურისა და სპორტის სფეროებში. მხარეებმა აღნიშნეს ორ ქვეყანას შორის პოლიტიკური დიალოგის განვითარების, სამართლებრივი ბაზის გაღრმავებისა და ორმხრივი ვიზიტების გაცვლის მნიშვნელობა.

კოლუმბიის მხარის გადაწყვეტილებით, უახლოეს მომავალში საქართველოს მოქალაქეებს მიეცემათ შესაძლებლობა, უვიზოდ იმოგზაურონ კოლუმბიაში.

Internet.ge