მურმან დუმბაძემ, ქსენოფობიური განცხადების გაკეთების გამო, ბოდიში მოიხადა. 

საქმე ეხება „ქართული ოცნების“ წევრისა და საზოგადებრივი მოძრაობა „ემსახურე საქართველოს“ ლიდერის, მურმან  დუმბაძის მიერ ღია ეთერში გაკეთებულ განცხადებას, როდესაც დუმბაძემ „რესპუბლიკური პარტიის“ აჭარის ორგანიზაციის ხელმძღვანელის მისამართით განაცხადა, რომ გიორგი მასალკინი გენით ქართველი არ არის და მას საქართველო არ ესმის.

დუმბაძის ეს განცხადება მწვავედ შეფასდა უფლებადამცველი ორგანიზაციებისა და სახალხო დამცველის მხრიდან. 

მოგვიანებით გაირკვა, რომ ბიძინა ივანიშვილმა, რომელმაც მურმან დუმბაძეს აჭარაში „ქართული ოცნების“ სტრუქტურის ჩამოყალიბება დაავალა, ამის შესახებ არაფერი იცოდა. „როდის გააკეთა მან ეს განცხადება? არ მინახავს. თუ მართლა ასეა, შევხდები ბატონ მურმან დუმბაძეს და ამაზე პასუხს მოვთხოვ“-განაცხადა ივანიშვილმა ჟურნალისტებთან საუბრისას.

მურმან დუმბაძემ ჩვენთან საუბრისას კი განაცხადა, რომ მას ივანიშვილი არ შეხვედრია და არც რაიმე შენიშვნა მიუცია.

„მე  ბიძინა ივანიშვილი არ შემხვედრია და არც ტელეფონით გვისაუბრია. ჩემი განცხადება არ ყოფილა არც ქსენოფობიური და არც დისკრიმინაციული. ეს იყო ემოციური განცხადება, რის გამოც მე ქართული საზოგადოებისა და გიორგი მასალკინის წინაშე ბოდიში მოვიხადე“-განაცხადა მურმან დუმბაძემ.

Internet.ge